დღეს, 4 თებერვალს, 16:30 საათზე, ხევსურეთის სოფელ ბარისახოს საჯარო სკოლის დასახმარებლად თავისუფალი უნივერსიტეტის საკონფერენციო დარბაზში ინტელექტუალური თამაში ''ბრეინ-რინგი'' გაიმართება. როგორც "ჯი-ეიჩ-ენს" საღამოს ორგანიზატორმა, თინათინ ღოლაძემ განუცხადა, ღონისძიებაში მონაწილეობენ თავისუფალი უნივერსიტეტის, კავკასიის უნივერსიტეტის და საქართველოს უნივერსიტეტის ბიზნესის ადმინისტრირების ფაკულტეტის მაგისტრანტები.
"სოფელი ბარისახო დუშეთიდან 63 კილომეტრის დაშორებით მდებარეობს და გარესამყაროს მოწყვეტილია. სოფლის მაღალმთიანი მდებარეობისა და მოსახლეობის ეკონომიკური მდგომარეობის გამო, მათთვის რთულია საჭირო სასკოლო ნივთების შეძენა. ''ბრეინ რინგში'' მონაწილეობისთვის მოთამაშეები იხდიან გარკვეულ თანხას. შემოსული თანხა სრულად გადაერიცხება ხევსურეთის, სოფელ ბარისახოს სკოლას, თავისუფალი უნივერსიტეტი კი გამოყოფს სასკოლო ინვენტარს", - განაცხადა ღოლაძემ.
ღონისძიებას დაესწრება ბარისახოს სკოლის წარმომადგენელი შუქია არაბული.
დაგეგმილია გამარჯვებული გუნდისა და საუკეთესო მოთამაშეების გამოვლენა და დაჯილდოება.
