კანონის ლიბერალიზაციის შემდეგ პირები, რომლებიც დანაშულს 25-დან 75 ათასამდე ოდენობის გადასახადების დამალვის ბრალდებით სასჯელს იხდიან, საპატიმრობს დატოვებენ.
როგორც დღეს, პარლამენტის რიგგარეშე სხდომაზე იურიდიულ საკითხთა კომიტეტის თავმჯდომარემ პავლე კუბლაშვილმა განმარტა, ოპოზიციასთან შედგა შეთანხმება, რომლის თანახმადაც კანონს უკუქმედების ძალა ექნება.
"კანონი გავრცელდება ადრე ჩადენილ დანაშაულზეც", - აღნიშნა კუბლაშვილმა ფრაქცია "ერთობა სამართლიანობის" წევრების ჯონდი ბაღათურიასა და დიმიტრი ლორთქიფანიძის კითხვების საპასუხოდ.
შეგახსენებთ, რომ ცვლილება შედის „საქართველოს სისხლის სამართლის კოდექსში", რომლის თანახმადაც, დიდი ოდენობად ჩაითვლება თანხამ თუ ის 50 ათას ლარს აღემატება, ხოლო განსაკუთრებით დიდ ოდენობად, თანხა რომელიც 100 ათას ლარს აღემატება.
მოქმედი კანონმდებლობით, კი გადასახადებისთვის თავის არიდების მუხლის მიზნებისთვის დიდ ოდენობად ითვლება თანხა, რომელიც 25 ათას ლარს აღემატება, რომელიც ისჯება ჯარიმით ან თავისუფლების აღკვეთით ვადით სამიდან ხუთ წლამდე, ხოლო განსაკუთრებით დიდ ოდენობად, რომელიც 75 ათას ლარს აღემატება და ისჯება თავისუფლების აღკვეთით ვადით ხუთიდან რვა წლამდე.
აღსანიშნავია, რომ "ქრისტიან-დემოკრატები" ითხოვდნენ, რომ კანონში შეტანილ ცვლილებებს უკუქცევის ძალა ჰქონოდა, რაც ინიციატორებმა გაითვალისწინეს.
კანონი ძალაში 2012 წლის პირველი თებერვლიდან შევა.
