არასამთავრობო ორგანიზაცია "ქართულ-აფხაზური და ქართულ-ოსური სახლის" თავმჯდომარემ, პროფესორმა ნესტან კირთაძემ ტელეკომპანია თრიალეთის ეთერიდან ცხინვალში მცხოვრებ ოსებს მიმართა და „ქართულ-აფხაზური და ქართულ-ოსური სახლის" სატელევიზიო პრეზენტაცია გამართა.
"ქართულ-აფხაზური და ქართულ-ოსური სახლი" ეს არის 2008 ომის შემდგომ საქართველოში პირველი სამშვიდობო ინიციატივა და ინსტიტუცია, პირველი სამშვიდობო კერა და ცენტრი, რომელიც ხელს უწვდის აფხაზებს და ოსებს პირდაპირი, ორმხრივი დიალოგის დაწყებისათვის, და პირველი ნაბიჯების გადასადგმელად მშვიდობიანი თანაარსებობის და თანაცხოვრებისათვის", - განაცხადა ნესტან კირთაძემ.
გადაცემის მსვლელობისას კირთაძემ ცხინვალში ოსებს მიმართა:
"ისტორიული შეცდომა და დანაშაულია ჩვენს შორის ომი და კონფრონტაცია, სისხლი, რომელიც ჩამოწვა, დაიღუპნენ ადამიანები და თავიანთი მიწა-წყლიდან აიყარნენ. ჩვენ გვყავს შერეული ოჯახები და მაშასადამე, გვაქვს საერთო საზრუნავი. ჩვენ ვართ მართლმადიდებლები და გვაქვს ერთიანი პასუხისმგებლობა. ომმა გაგვთიშა და ერთმანეთს დაგვაპირისპირა. Aახლა, მე გიწვდით ხელს, ჩვენო ძმებო და დებო, ჩვენო დედებო და მამებო, ჩვენო სისხლო და ხორცო და მოგმართავთ, რომ ჩვენ ხელახლა უნდა აღმოვაჩინოთ და გავიცნოთ ერთმანეთი. ჩვენ უნდა მოვუსმინოთ ერთმანეთს და არ დავუშვათ ქართველი და ოსი მომავალი თაობების ერთმანეთთან გაუცხოვება - მითუმეტეს მტრობა. ჩვენ უნდა გადავდგათ პირველი სამშვიდობო ნაბიჯები ერთმანეთისაკენ. ჩვენ უნდა გავუფრთხილდეთ ჩვენი სამშვიდობო მომავლისაკენ გაჟღერებულ ყოველ ინიციატივას, ყოველ სიტყვას და ფრაზას, და ხელახლა ვისწავლოთ ერთმანეთის მოსმენაც, ნდობაც და ურთიერთთანამშრომლობაც. ჩვენი სამშვიდობო ურთიერთობები გარდაუვალი რეალობაა. ჩვენ ერთად გადავდგამთ პირველ ნაბიჯებს ამ რეალობის შესაქმნელად", - განაცხადა ნესტან კირთაძემ.
ორშაბათს, 19 დეკემბერს ნესტან კირთაძე გამართავს სპეციალურ პრესკონფერენციას „ქართულ-აფხაზური და ქართულ-ოსური სახლის" დაფუძნების შესახებ.
