ბიძინა ივანიშვილთან დადგომით პოლიტიკური ძალები საკუთარი თავის ლუსტრაციას ახდენენ. ამის შესახებ საპარლამენტო უმრავლესობის წევრმა ვახტანგ ბალავაძემ ივანიშვილი, „რესპუბლიკელებისა" და „თავისუფლაი დემოკრატების" პოლიტიკური ბლოკის შექმნის შეფასებისას აღნიშნა.
„თუ ვინმეს ჰგონია, რომ ხალხის და პოლიტიკის ყიდვა ფულით შეიძლება, მინდა უთხრა, რომ ფულის გარდა საქართველოში სხვა ღირებულებებიც არის. ივანიშვილი რასთანაც ასოცირდება ეს ყველა იცის და ის ხალხი, ვინც მასთან ერთად არის თავის ლუსტრაციას ახდენენ", - აღნიშნა ბალავაძემ.
მისივე შეფასებით, ივანიშვილის გამოჩენამდე „რესპუბლიკელებს" და „თავისუფლა დემოკრატებს" არანაირი პოლიტიკური რეიტინგი არ ჰქონიათ და ამის გათვალისწინებით მათი სერიოზულ კონკურენტულ პოლიტიკურ ძალად აღქმა ძნელია.
„ეს სამი სუბიექტი ისედაც ერთად იყო, თუმცა არც ერთ სუბიექტს არც დღეს და არც მანამდე არანირი პოლიტიკური რეიტინგი არ ჰქონია. მათი გაერთიანება ეს არის სურვილი დაბრუნდნენ წარსულში", - აცხადებს მმართველი პარტიის წევრი.
შეგახსენებთ, რომ ბიძინა ივანიშვილი, „თავისუფალი დემოკრატების" ლიდერი ირაკლი ალასანია და "რესპუბლიკური პარტიის" თავმჯდომარე დავით უსუფაშვილი შეთანხმდნენ, რომ სამი პოლიტიკური სუბიექტისგან შემდგარი კოალიცია შეიქმნება მას შემდეგ, რაც ბიძინა ივანიშვილის პოლიტიკური პარტიის ფორმირების პროცესი დასრულდება.
