ბიძინა ივანიშვილის განცხადებით, საქართველოს პრეზიდენტს მიხეილ სააკაშვილს ძალიან ძნელია ნიჭიერი პოლიტიკოსი უწოდო.
"სააკაშვილი დღეს დიქტატურაზეც არ იტყვის უარს. მას დღეს აღარავითარი პოლიტიკური რესურსი არ აქვს როგორც ქვეყნის შიგნით, ასევე ქვეყნის გარეთ და ის რომ ის ბორკილი გახდა საზოგადოების განვითარების. ამ ყველაფრის გათვალისწინებით, ძალიან რთულია მას ნიჭიერი პოლიტიკოსი უწოდო. სააკაშვილს ვერც ერთ შემთხვევაში ვერ დავაყენებთ ნიჭიერებში. მაგრამ ის ჯერ კიდევ ახალგაზრდაა და მას შეუძლია თავისი ცხოვრების მანძილზე გადავიდეს პლუსებში", - განაცხადა ივანიშვილმა ტელეკომპანია "მაესტროს" ეთერში.
მისი თქმით, ნიჭიერებას ავლენენ იმის მიხედვით თუ რამდენად მეტი სარგებელი მოაქვს საზოგადოებისთვის.
"მხატვარი იქნება, ბიზნესმენი თუ პოეტი, მთავარია ვინ ახერხებს უკეთესად შეისწავლოს საზოგადოების მოთხოვნილება და მიაწოდოს ის, რაც სჭირდება საზოგადოებას. ნიჭიერი ახერხებს გამოიცნოს საზოგადოების მოთხოვნილება და დროზე მიაწოდოს სასარგებლო პროდუქტი. ამაში შედიან ბიზნესმენებიც, პოლიტიკოსებიც. პოლიტიკოსის ნიჭიერება აიხსნება იმით წაიყვანს თუ არა ქვეყანას სწორი გზით", - განაცხადა ივანიშვილმა.
