"ქართუ ბანკი" ბიზნესომბუდსმენისგან საგადასახადო კოდექსის 239-ე მუხლსა და სააღსრულებლო წარმოებათა შესახებ კანონის 82-ე მუხლში შესული ცვლილებების გამო, რეაგირებას ითხოვს.
ცვლილებების მიხედვით, ბანკში ჩადებულ ქონებაზე თუ წარმოიქმნა საგადასახადო ვალდებულება, პირველ რიგში დაკმაყოფილდება საგადასახადო ორგანოს მოთხოვნა, ხოლო შემდეგ კომერციულ ბანკის.
"ქართუ ბანკში" მიიჩნევენ, რომ ბანკი, როგორც პირველი რიგის იპოთეკარი, ფაქტობრივად, აღარ წარმოადგენს უზრუნველყოფილ კრედიტორს.
კანონში შეტანილი ცვლილების მიხედვით, თუ ბანკი წარმოადგენს პირველი რიგის იპოთეკარს და იპოთეკის რეგისტრაციის შემდეგ აღმოჩნდება, რომ საგადასახადო გირავნობის წარმოშობის საფუძვლები არსებობდა ბანკის იპოთეკის რეგისტრაციამდე, მაშინ პირველ რიგში დაკმაყოფილდება საგადასახადო გირავნობა, ხოლო შემდეგ ბანკის წინაშე ნაკისრი ვალდებულება.
ბიზნესომბუდსმენ გიორგი პერტაიას განცხადებით, ეს არის ჩვეულებრივი დავა შემოსავლების სამსახურსა და ბანკებს შორის, რაც საზღვარგარეთაც ხდება. შემოსავლების სამსახური ცდილობს რისკები შეიმციროს და თავისი თანხები ამოიღოს, ბანკები კი, თავის მხრივ, ცდილობენ, პირველ რიგში, თავად ამოიღონ ეს იპოთეკა. თვითონ ბიზნეს ომბუდსმენი ამ ცვლილებას არ ეთანხმება.
აღნიშნული ცვლილების თაობაზე წერილით მოგვმართა "ქართუ ბანკმა", რომელშიც საუბარია ცვლილების უარყოფით გავლენაზე საბანკო სფეროზე. ჩვენ ვეთანხმებით წერილში დაფიქსირებულ პოზიციას, რადგან ამან შესაძლებელია გამოიწვიოს ბანკებისათვის რისკების ზრდა და შესაბამისად ეკონომიკის დაფინანსების ტემპების შენელება. მაგრამ არ ვეთანხხმებით იმას, რომ აღნიშნულ საკითხს მხოლოდ ქართუ ბანკს უკავშირებენ და ახდენენ ამ საკითხის პოლიტიზებას. კანონის ცვლილება თანაბრად ეხება აბსოლიტურად ყველა ბანკს და დავა არის აბსოლიტურად ნორმალური, სადაც შემოსავლების სამსახური თავისი რისკების შემცირებას აპირებს ბანკებისათვის რისკების ზრდის ხარჯზე. აღნიშნული საკითხი 2 წლის წინაც იყო და იყო დავა, როგორ უნდა ჩამოყალიბებულიყო კანონპროექტის საბოლოლოო ვერსია", - განუცხადა "ჯი-ეიჩ-ენს" პერტაიამ.
თავის მხრივ, "ქართუ ბანკი" კატეგორიულად აცხადებს, რომ საკითხის დასმა არანაირად არ უკავშირდება მისი პოლიტიზების მცდელობას.
როგორც "ჯი-ეიჩ-ენს" ბანკის პრეზიდენტმა ნოდარ ჯავახიშვილმა განუცხადა, სხვა ბანკები აღნიშნულ საკითზე დუმან და შესაბამისად იგი იძულებული გახდა ეს საკითხი გაეხმაურებინა.
ჯავახიშვილი მიიჩნევს, რომ დუმილი ბანკების მხრიდან ეჭვის საფუძველს ბადებს.
"რა შუაშია საკითხის პოლიტიზება? თუ ეს საბანკო სექტორისთვის ცუდია, მაშინ რატომ არ იღებენ სხვა ბანკები ხმას? იმიტომ, რომ, ალბათ, საეჭვოდ არიან შეკრულები. ისინი რომ არ იღებენ ხმას, მე ამოვიღე ხმა და ამიტომ მივწერე წერილი ბიზენსომბუდსმენს. ისიც რომ ზის იქ, რატომ აქამდე არ დაინტერესდა საკითხით? ვიდრე მე არ მივწერე, რა, მანამდე არ უნდა გაერკვია რა ხდება?! როდესაც მე, ბანკი, ვიღებ ქონებას გირაოში და მაშინ სახელმწიფო მეუბნება, რომ მასზე რაიმე სხვა ვალდებულება არ არის და უცებ აღმოჩნდება, რომ საგადასახადო დავალიანება ჰქონიათ, რომელსაც შემდგომ აღმოაჩენენ, კარგია ეს?!" - განუცხადა "ჯი-ეიჩ-ენს" ჯავახიშვილმა.
ბიზნეს ომბუდსმენი კანონში განხორციელებულ ცვლილებასთან და ჯავახიშვილის განცხადებასთან დაკავშირებით განმარტავს, რომ მისი მხრიდან ხდება საკანონმდებლო ცვლილებების ზედამხედველობა, თუმცა ოფიციალური პოზიციას აფიქსირებს იმ შემთხვევაში თუ მას უფლებათა დარღვევის თაობაზე მიმართავს გადასახადის გადამხდელი, შესაბამისად ბიზნეს ომბუდსმენი გეგმავს რეკომენდაციით მიმართოს შესაბამის სახელმწიფო ორგანოს.
ამასთან, ბიზნეს ომბუდსმენი კიდევ ერთხელ აფიქსირებს საკუთარ პოზიციას და აცხადებს, რომ თუ შემოსავლების სამსახური თანხის ამოღებას დაიწყებს ბანკებზე ადრე, მაშინ ბანკებს სავარაუდოდ გაეზრდებათ რისკები და რისკების პროპორციულად შემცირდება ეკონომიკის დაფინანსება ბანკების მხრიდან.
"მთლიანობაში ცვლილება საქართველოს ეკონომიკაზე ნეგატიურად აისახება. ერთი, რასაც ჩვენ ვიძახით, არის ის, რომ ეს არის ცუდი - არ არის კარგი ცვლილება ბიზნესისთვის. თუმცა მეორე მხრივ აბსოლუტურად ნორმალურია, რასაც შემოსავლების სამსახური ითხოვს და ამაში არაფერი ახალი არ არის", - აცხადებს "ჯი-ეიჩ-ენთან" საუბარში პერტაია.
პერტაია დასძენს, რომ აღნიშნული საკითხი პოლიტიკური საკითხი არ არის.
"არა მგონია "ქართუ ბანკს " უფრო მეტი კლიენტი ჰყავდეს და უფრო მეტი სესხი ჰქონდეს გაცემული, ვიდრე, ვთქვათ "თი-ბი-სის" ან "საქართველოს ბანკს". ანუ ეს ყველაფერი საბანკო სფეროს პრობლემაა და არა ცალკეული ბანკის", - განმარტავს პერტაია.
