ამიერკავკასიაში პირველი 18-ორმოიანი პროფესიული გოლფ კლუბი და უდიდესი რეკრეაციული კომპლექსი კრწანისში, 330 ჰექტარ ტერიტორიაზე გაშენდება. გოლფის კლუბის მშენებლობას თბილისის მერმა გიგი უგულავამ ესპანელ ინვესტორთან, გრუპო პასტორის დამფუძნებელ პედრო პასტორთან ერთად ჩაუყარა საფუძველი, საძირკველში სიმბოლურად ჩადო კაფსულა და ტერიტორიის განვითრების სამომავლო გეგმებს გაეცნო.
თბილისის მერია ხელს უწყობს ქალაქში ინვესტიციების მოზიდვასა და სხვადასხვა ობიექტის მშენებლობას, რაც დამატებით ახალ სამუშაო ადგილებს ქმნის.
330 ჰექტარ ტერიტორიაზე პანორამული ხედის "ქლაბ ჰაუსი", გოლფის სათამაშო მოედანი, საცურაო აუზი, სილამაზისა და გამაჯანსაღებელი ცენტრები, სავარჯიშო დარბაზები, ჩოგბურთის მოედნები, მაღალი კლასის სასტუმრო და საკონფერენციო დარბაზები გაშენდება.
მსოფლიო პრაქტიკის გათვალისწინებით, გოლფ კლუბის ირგვლივ არსებული განაშენიანება და საცხოვრებელი ნაწილი ყველაზე მაღალი კლასის რეზიდენტული ზონა გახდება ამიერკავკასიაში.
პროექტის პირველი ფაზა, განაშენიანების დაგეგმარება და დიზაინი გოლფ კლუბის მსოფლიოში აღიარებულმა ესპანელმა დიზაინერებმა 2010 წლის აგვისტოს დაიწყეს.
ამ ეტაპზე მეორე, სამშენებლო ფაზა მიმდინარეობს, რომელიც გოლფის მოედნის, წყლისა და სხვა საკომუნიკაციო არხების მშენებლობას გულისხმობს. ტერიტორიაზე ასევე მიმდინარეობს გოლფის სავარჯიშო მოედნისა და საკლუბო სივრცის მშენებლობა.
პროექტი ორი წლის განმავლობაში დასრულდება.
ექსპლუატაციაში შესვლის შემდეგ, "პრიმერა გოლფ კლაბში" ჩატარდება მსოფლიო დონის გოლფის ჩემპიონატები, რაც ქალაქში ტურისტების რაოდენობას მნიშვნელოვნად გაზრდის.
"პრიმერა გოლფ კლუბი" ევროპული ინვესტიციით ფინანსდება და მისი მშნებლობის სავარაუდო ღირებულება 20 მილიონ დოლარს შეადგენს.
გოლფ კლუბის მშენებლობასა და მართვას კომპანია "გრუპოპასტორი" ახორციელებს. კომპანიის ძირითადი მიმართულება მაღალი კლასის ურბანისტული განაშენიანებაა, რომელიც ხშირად ჰარმონიულად ინტეგრირდება გოლფ კლუბებთან. "გრუპოპასტორი" თავის პარტნიორ კომპანიებთან ერთად მსგავს პროექტებს მთელი მსოფლიოს მასშტაბით ახორციელებს. კომპანია ადგილობრივი კადრების გადამზადებას საერთაშორისო სტანდარტების მიხედვით ესპანეთში გეგმავს, რაც მომსახურების მაღალ ხარისხს უზრუნველყოფს.
უგულავას განცხადებით, ამ პროექტის მნიშვნელობა ძალიან დიდია, რადგან ახალ სივრცეს აჩენს ახალი სამუშაო ადგილებისთვის.
"ამ პროექტს საერთაშორისო კომპანია მართავს, აქიდან გამომდინარე, ბევრ ტურისტს უნდა ველოდოთ. ეს არის ქალაქის ყველაზე მოწყვეტილი, მაგრამ ერთ-ერთი ულამაზესი ადგილი. აქედან იშლება ულამაზესი ხედები, რაც ქალაქს მიმზიდველობას მატებს. ეს არის ტურიზმის თვალსაზრისით აბსოლიტურად უნიკალური ახალი ნიშა, რომელსაც ჩვენ დავიკავებთ. რაც მთავარია, ქალაქისთვის ახალი პერსპექტივა, ახალი დასახლება, რომელიც კონკურენციას გაუწევს წყნეთსა თუ კოჯორს თავისი გოლფის მოედნებით. მშენებლობის სტადიაზე, სულ მცირე, 500-600 ადამიანი დასაქმდება, ხოლო სერვისსა და მომსახურებაზე შეიძლება გაცილებით მეტი სამუშაო ადგილი შეიქმნება თბილისელებისთვის, რაც ძალიან მნიშვნელოვანია.
