"დემოკრატიული მოძრაობა - ერთიანი საქართველოს" მთავარი საბჭო განცხადებას ავრცელებს. ისინი აცხადებენ, რომ მხარს უჭერენ ადვოკატთა ასოციაციისა და მისი ხელმძღვანელობის ძალისხმევას, "ქვეყნის მკვეთრად არადემოკრატიული რეჟიმის პირობებში დაიცვან ადამიანის უფლებები, მაქსიმალური ძალისხმევა მიმართონ უკანონოდ დაკავებული ადვოკატების ტყვეობიდან გამოხსნისკენ".
"საქართველოს ხელისუფლება ადვოკატთა უფლებების ფაქტობრივი შეზღუდვისა და მათი დიკრედიტაციის მცდელობის ფონზე, ძალოვანი სახელისუფლებო ვერტიკალის გაუგონარი გაძლიერებით კიდევ ერთხელ ადასტურებს, რომ არაა დემოკრატიულ რეფორმებზე ორიენტირებული და შესაშური ენტუზიაზმით ცდილობს პოლიციური სახელმწიფოს რეპრესიული აპარატის კიდევ უფრო გაძლიერებას. სრული პასუხისმგებლობით ვაცხადებთ, არ ვაპირებთ ამ კაცთმოძულე, თანამედროვე ცივილიზებული მსოფლიოსთვის შეუთავსებელი რეჟიმის მიერ, ადვოკათტა და სხვა უფლებადამცველთა უფლებების უხეშ დარღვევას შევეგუოთ. დემოკრატიული ფასეულობებისადმი მტრულად განწყობილი ხელისუფლების ბედს მალე თავისუფალი, მიუკერძოებელი და სასამართლიანი სასამართლო გადაწყვეტს", - ნათქვამია განცხადებაში.
