11 ნოემბერს, 13:00 საათზე, საქართველოს კულტურისა და ძეგლთა დაცვის სამინისტროს ART-კაფეში ასოციაცია "გლობალ სტარის" ახალი პროექტის, "შეიცანი საქართველოს", პრეზენტაცია გაიმართება.
"გლობალ სტარი", საქართველოს კულტურისა და ძეგლთა დაცვისა და საქართველოს განათლებისა და მეცნიერების სამინისტროების მხარდაჭერით, იწყებს პროექტის - "შეიცანი საქართველო" - განხორციელებას. პირველ ეტაპზე, სასკოლო ასაკის ბავშვებისათვის შემუშავდა შემეცნებით-გასართობი ექსკურსიების 20-მდე მიზნობრივი პაკეტი.
საექსკურსიო პაკეტები ითვალისწინებს ბავშვთა ცოდნის გაღრმავებას მრავალი მიმართულებით. აქედან გამომდინარე, საექსკურსიო მარშრუტებში შედის საქართველოს ტერიტორიაზე არსებული ისტორიული ძეგლების, მუზეუმების, ეკლესია-მონასტრების მონახულება; ასევე, დაცული ტერიტორიების დათვალიერება, არსებული უნიკალური ლანდშაფტის გაცნობა და ეკოთამაშებში მონაწილეობა. საექსკურსიო მარშრუტები ითვალისწინებს საქართველოს უმაღლეს სახელმწიფო სტრუქტურებში, პრეზიდენტის ადმინისტრაციასა და პარლამენტში ვიზიტს.
პაკეტების შემუშავების პროცესში გათვალისწინებულია ბავშვების უსაფრთხო და კომფორტული ტრანსპორტირება. საექსკურსიო პაკეტები ითვალისწინებს ბავშვთა ასაკობრივი ჯგუფების ფიზიკურ და ინტელექტუალურ შესაძლებლობებს და მათ ინტერესებს. შესაბამისად, წარმოდგენილია პატარა ასაკის (6-იდან 11 წლამდე), მოზრდილი (11-იდან -13 წლამდე) და უფროსი (13 -იდან 18 წლამდე) ასაკის ბაშვებისთვის სხვადასხვა შეთავაზება.
