ცენტრალურმა საარჩევნო კომისიამ საზოგადოებრივი საკონსულტაციო საბჭოს მორიგი შეხვედრა გამართა. ცესკოს თავმჯდომარემ შეხვედრაზე, საქართველოს რეგიონებში კომისიის საქმიანობის შესახებ ინფორმაცია წარადგინა.
2012-2014 წლებში დაგეგმილი არჩევნებისთვის ცესკო რეგიონებში საარჩევნო გარემოს გაუმჯობესებას განსაკუთრებულ ყურადღებას უთმობს; ამიტომ არსებითად მნიშვნელოვანია როგორც რეგიონული მედიის, ისე ადგილობრივი არასამთავრობო ორგანიზაციების როლის გაზრდა და მათი აქტიური ჩართულობა საარჩევნო პროცესებში ამომრჩეველთა ცნობიერების ამაღლების მიზნით.
საბჭოზე განიხილეს ცესკოს თავმჯდომარის ვიზიტები საქართველოს რეგიონებში პოლიტიკური პარტიების რაიონული ერთეულების, არასამთავრობო ორგანიზაციების, ადგილობრივი მედიის და საოლქო საარჩევნო კომისიების წარმომადგენლებთან. (კომისიის თავმჯდომარემ შეხვედრები გამართა კახეთის, აჭარის, გურიის, სამეგრელოს, ყაზბეგის, მცხეთა-მთიანეთის, რაჭა-ლეჩხუმის რეგიონებში).
საბჭოს წევრებმა განიხილეს ცესკოს წარმომადგენლების შეხვედრების შედეგები რეგიონულ მედიასთან; (სადაც ძირითადად რეგიონებში ამომრჩეველთა სათანადოდ ინფორმირების საშუალებებს განიხილავდნენ). შეხვედრის მონაწილეები ასევე ურთიერთთანამშრომლობის მემორანდუმსაც გაეცნენ, რომელიც 31 ოქტომბერს 4 რეგიონულ მედია ორგანიზაციასთან გაფორმდა.
შეხვედრას, რომლიც სასტუმრო "ამბასადორში" იმართება, ცესკოს საზოგადოებრივი საკონსულტაციო საბჭოს წევრები: საარჩევნო საკითხებში ჩართული პოლიტიკური პარტიების, საერთაშორისო და ადგილობრივი არასამთავრობო ორგანიზაციების, მედია საშუალებების წარმომადგენლები და დამოუკიდებელი ექსპერტები ესწრებიან.
საზოგადოებრივი საკონსულტაციო საბჭო ცენტრალური საარჩევნო კომისიის ინიციატივით 2010 წლის დეკემბერში ჩამოყალიბდა და მას შემდეგ რვა შეხვედრა გაიმართა. საბჭოს წევრებმა შეხვედრებზე განიხილეს ისეთი მნიშვნელოვანი საკითხები, როგორიც არის მოწყვლადი კატეგორიის ამომრჩეველთა ხელშეწყობის მიზნით განსახორციელებელი სამუშაოები, მედია და არჩევნები, პოლიტიკური პარტიების და საარჩევნო კამპანიის დაფინანსება, საარჩევნო სისტემები და საარჩევნო ადმინისტრაციები და სამოქალაქო განათლების როლი საარჩევნო გარემოს გაუმჯობესებაში.
