საპარლამენტო უმცირესობის ლიდერი გიორგი თარგამაძე ხელისუფლებას მოუწოდებს ციტრუსის რთველთან დაკავშირებით გადამჭრელი ზომები მიიღოს.
პარლამენტის დღევანდელ პლენარულ სხდომაზე გიორგი თარგამაძემ განაცხადა, რომ დასავლეთ საქართველო შიშით ელოდება ციტრუსის რთველს, რადგან კარგად იციან, რომ გლეხების ოჯახის შემოსავალი მთელი წლის მანძილზე დამოკიდებულია იმაზე, თუ როგორ გაყიდიან ამ ციტრუსს.
გიორგი თარგამაძე ამბობს, ციტრუსის რეალიზაციასთან დაკავშირებით ქვეყანაში საგანგაშო ვითარებაა შექმნილი. მისივე Fსიტყვებით, სახელმწიფომ წელს, შარშანდელისგან განსხვავებით, მინიმალური სუბსიდიაც არ გაითვალისწინა.
~იმ ქვეყანაში, სადაც ქართული ციტრუსის ექსპორტი ხდება, გაძვირდა გადასახადები, ხოლო საქართველოს რკინიგზას არ აქვს სათანადო სამაცივრო ვაგონები, რომლითაც შესაძლებელი იქნებოდა ამ ციტრუსის თუნდაც უკრაინაში გატანა", - აღნიშნა საპარლამენტო უმცირესობის ლიდერმა.
მისივე თქმით, მიუხედავად იმისა, რომ ციტრუსის რთველი ქვეყანას კარზე მოადგა, დღემდე გაურკვეველია "ორი ჩამორთმეული თუ წართმეული საწარმოს ბედი, რომლებიც აჭარაშია".
"საგანგაშოდ ვაფასებთ იმ მდგომარეობას, რაც მოჰყვება ციტრუსის რთველს", - განაცხადა გიორგი თარგამაძემ.
