თელავის რაიონის სოფელ შუამთაში ახალი აგრო ტურიზმის ცენტრი და სასტუმრო კომპლექსი საქართველოს პრეზიდენტმა დღეს სოფლის მეურნეობის მინისტრთან ერთად გახსნა. მიხეილ სააკაშვილს ადგილობრივი ინფრასტუქტურა დაათვალიერებინეს და ის მომსახურება გააცნეს, რასაც „შატო მერე"-ს სტუმრები მიიღებენ. საქართველოს პრეზიდენტმა ღვინის ექსპორტის პრობლემებზეც ისაუბრა და ხაზგასმით აღნიშნა, რომ მსგავსი ობიექტები უცხოეთში ქართული ღვინის პოპულარიზაციასა და ექსპორტს, ასევე ახალი ბაზრების ათვისებას შეუწყობს ხელს.
„ჩვენ მცირემიწიანი ქვეყანა ვართ და ჩვენი პრობლემა ის არის, რომ ვერ ვთანამშრომლობთ ერთმანეთთან. ერთადერთი შანსი, რომ ამ მცირე მიწის პირობებში ეფექტური სოფლის მეურნეობა გვქონდეს, არის კოოპერირება. თუკი საქართველოში ეს როდესმე გამოგვივა, ძალიან კარგი იქნება, თუმცა აქამდე ამას ვერ ვახერხებდით. ტურიზმის თვალსაზრისით კახეთში წარმოუდგენელი პოტენციალია, რადგან აქ რეალურად ძალზე მშრალი კლიმატი, ულამაზესი ხედები, საუკეთესო საჭმელი- სასმელი და, რაც მთავარია, სტუმარ-მასპინძლობის საოცარი ტრადიციაა. დღეს სწორედ ეს არის საქართველოს ყველაზე დიდი ტურისტლი პოტენციალი. თბილისი კი, საერთაშორისო ცენტრია. რეალურად, აქ შეგვიძლია ტურისტები მთელი მსოფლიოდან ჩამოვიყვანოთ. სოფლის მეურნეობის სამინისტროს ერთ-ერთი ფუნქციაც ეს არის - ყველანაირად შევუწყოთ ხელი ამ მიწების კოოპერირებას, გარშემო მსგავსი ცენტრების გაერთიანებას და აგროტურიზმს.
უკრაინის ბაზარზე 600 ათასიდან 7,8 მილიონამდე ბოთლი ღვინო გავიტანეთ. პოლონეთში ორი-სამჯერ უფრო დიდი ბაზარი, მეტი ფულია და ზუსტად ისეთივე სიმპატიით არიან განწყობილი საქართველოს მიმართ, როგორც უკრაინაში. მაგრამ აქ ვერ მიხვდნენ როგორ უნდა შევიდნენ პოლონურ ბაზარზე. სხვათა შორის, როდესაც იქ ჩავედი, ჩვენს ერთ-ერთ წარმომადგენელს ვკითხე რამდენ ბოთლ ღვინოს ვყიდით პოლურ ბაზარზე. მიპასუხა: ძალიან ბევრსო. ზუსტი რაოდენობა მან არ იცოდა, მაგრამ მე ვიცი -ეს არის 200 ათასამდე ბოთლი, ანუ, პრაქტიკულად, არაფერი. შეუძლებელია, რომ ჩვენი ღვინო არ იქ გადიოდეს. ისიც შეუძლებელია დარჩენილი ღვინო აქვე ვერ გავყიდოთ მთლიანად. დადგება დრო, როდესაც ვეღარც გავიტანთ ექსპორტზე - ტურიზმი შთანთქავს. ტურიზმმა შეიძლება ისიც გაგვიკეთოს, რომ ღვინის ხარისხი დაეცეს. არადა, ჩვენთვის ეს ძალზე მნიშვნელოვანია, ქართული ღვინო ჩვენი კულტურის იდენტურობაა. ამ კომპლექსის მეპატრონე მართლაც ძალიან დიდ და კარგ საქმეს აკეთებს და სწორედ ის არის ყველაზე დიდი ნოვატორი ამ სფეროში.
ყოველივე ამას გომბორის გზის გაკეთებამაც შეუწყო ხელი, მართლაც ძალიან კარგი გზაა. ზოგიერთები ამბობდნენ, რომ ჩამოიშალაო, მაგრამ გზას მოვლა სჭირდება. მთავარი ისაა, რომ გომბორმა მოიტანა განვითარება, რადგან ეს არ გვექნებოდა გომბორის გზის გარეშე, არც გრემი იქნებოდა რომ არ აღგვედგინა და ყვარელი რომ არ გაგვეკეთებინა. თბილისთან ახლოს ყველაზე კარგი ადგილი ღვინის.
ჩვენ ძალიან დიდ და მნიშვნელოვან საქმეს ვაკეთებთ კახეთისთვის. სხვათა შორის, ნამდვილად არ მქონდა გათვალისწინებული იმის გაკეთება, რასაც თქვენ გრემში აკეთებთ, მაგრამ ისეთი მასშტაბის სამუშაოები მიმდინარეობს, რომ აქაურობა - ყვარელი, თელავი, სხვა რაიონები მომავალში შეიძლება საერთოდ ვეღარ იცნოთ. ჩემი ამბიციაა, რომ კახეთში, რომელიც ჩვენთვის მართლაც ყველაფერია, ცუდი აღარაფერი იყოს. მომავალ ზაფხულს და შემოდგომას აქ ძალიან დიდი ფესტივალები გაიმართება. ძალიან ბევრ უცხოელს ჩამოვიყვანთ, რათა ქართველებმაც იარონ და უცხოელებმაც, ფული დახარჯონ კიდეც და სიამოვნებაც მიიღონ. კახეთი ჩვენი კულტურული იდენტურობის გულია", - განაცხადა საქართველოს პრეზიდენტმა.
„შატო-მერე" მთლიანად ქართული ინვესტიციით აშენდა. ადგილზე მოწყობილია 15-ნომრიანი სასტუმრო, მარანი და საჯინიბო. კომპლექსის სტუმრები შეძლებენ სხვადასხვა ტურებში არაბული ჯიშის ცხენებით მიიღონ მონაწილეობა. კომპლექსის მესვეურები ტურისტებს ყურძნის დაწურვისა და ღვინის დამზადების პროცესის ადგილზე ნახვისა და აქ დამზადებული ღვინის დეგუსტაციის საშუალებას მისცემენ. „შატო მერეში" ღვინოს ქართული და ევროპული ტრადიციისამებრ დააყენებენ.
