ოჩამჩირის პორტში რუსული სასაზღვრო კატარღების განთავსებასთან დაკავშირებით, აფხაზეთის მთავრობის კაბინეტის უფროსმა ბესიკ სილაგაძემ სპეციალური ბრიფინგი გამართა. მისი განაცხადებით, ეს ფაქტი კრემლის რეჟიმის მიერ საქართველოს მიმართ აგრესიული და დამპყრობლური პოლიტიკის გაგრძელების ნათელი დადასტურებაა და მიზნად ისახავს რუსული მილიტარისტული ინტერესების განხორციელებას, როგორც საქართველოს ტერიტორიულ წყლებში, ასევე მთლიანად შავი ზღვის აუზში.
",რუსეთის მიერ "აფხაზეთის ტერიტორიული წყლების" დაცვა საერთაშორისო სამართლის ნორმების უხეში დარღვევაა, ვინაიდან განსაზღვრებას "აფხაზეთის ტერიტორიული წყლები" საერთაშორისო სამართალი არ ცნობს, ხოლო ე. წ. დამოუკიდებელი აფხაზეთი გლობალურ სისტემაში საერთოდ არ არსებობს", - განაცხადა სილაგაძემ.
მისი თქმით, რუსეთის ეს ქმედება კვალიფიცირდება, როგორც მეკობრეობა და აფხაზეთის ტერიტორიაზე საოკუპაციო სამხედრო კონტინგენტის გაძლიერებას ისახავს მიზნად.
",მოვუწოდებთ საერთაშორისო საზოგადოებას, მოახდინოს რეაგირება აღნიშნულ ფაქტთან დაკავშირებით, რათა მოხდეს რუსეთის ქმედებების საერთაშორისო სამართლებრივ ჩარჩოებში მოქცევა", -Gგანაცხადა სილაგაძემ.
აფხაზეთის მთავრობის თავმჯდომარის კაბინეტის უფროსი აფხაზეთში არსებული კრიმინოგენული ვითარებასაც შეეხო და აღნიშნა, რომ ოკუპირებულ ტერიტორიაზე კრიმინოგენული ვითარება დღითიდღე უარესდება. ხშიარია ადამიანის უფლებების უხეში დარღვევის ფაქტები.
"ყოველივე ეს უსაფრთხოების არარსებობის ნათელი მაგალითია", _ დასძინა სილაგაძემ.
