აშშ-ის სახელმწიფო მდივანმა მარკო რუბიომ უარყო ცნობები, რომ შეერთებულმა შტატებმა უკრაინას ბალისტიკური საფრთხეების შესახებ ინფორმაციის მიწოდება შეუწყვიტა. მისი თქმით, რუსეთის მიერ უკრაინის მიმართულებით ბალისტიკური რაკეტების გაშვების შესახებ გაფრთხილების არარსებობა ტექნიკურ პრობლემას უკავშირდებოდა და არა აშშ-ის ადმინისტრაციის განზრახ გადაწყვეტილებას.
ამის შესახებ რუბიომ ინდოეთში ჟურნალისტებთან საუბრისას განაცხადა. ინფორმაციას უკრაინული მედია ავრცელებს.
„ვნახე, რომ უკრაინის მთავრობის წარმომადგენლებთან დაახლოებულმა პირმა განაცხადა, თითქოს უკრაინაში ადამიანები იმიტომ იღუპებიან, რომ აშშ მათ ინფორმაციას არ აწვდის. ეს აღმაშფოთებელია. ეს დაუშვებელია. ეს უბრალოდ ტყუილია და სიმართლეს არ შეესაბამება“, - განაცხადა რუბიომ.
მისი თქმით, საუბარია რუსეთის მიერ 13 და 18 ოქტომბერს განხორციელებულ თავდასხმებზე. სახელმწიფო მდივნის განმარტებით, აშშ ამჟამად იკვლევს, რამ გამოიწვია გაფრთხილების სისტემაში არსებული პრობლემა.
„ის, რომ ინფორმაციის იდენტიფიცირებასთან დაკავშირებული პრობლემები იყო, შესაძლოა, ეს შიდა პრობლემა ყოფილიყო, რომელიც მათ მიერ მიღებული ინფორმაციის დამუშავების, სისტემატიზებისა და მასზე რეაგირების შესაძლებლობას უკავშირდებოდა. ეს სავსებით შესაძლებელია. თუმცა, საკითხს ვიკვლევთ. ჩვენი ამჟამინდელი შეფასებით, 13 და 18 ოქტომბერს მომხდარი ტექნიკური პრობლემა იყო“, - განაცხადა აშშ-ის სახელმწიფო მდივანმა.
რუბიოს თქმით, აშშ უკრაინას საჰაერო საფრთხეების შესახებ ინფორმაციას კვლავ აწვდის, როგორც ამას ყოველთვის აკეთებდა.
„ეს არ ყოფილა აშშ-ის რაიმე დირექტივის შედეგი, რომლითაც დარტყმის შესახებ გაფრთხილების მიწოდებაზე უარი ითქვა. ჩვენ ახლაც იმავე გაფრთხილებებს ვაწვდით, როგორსაც ყოველთვის ვაწვდიდით“, - თქვა მან.
