უკრაინის პრეზიდენტმა ვოლოდიმირ ზელენსკიმ განაცხადა, რომ აშშ-ის პრეზიდენტი დონალდ ტრამპი უკრაინისთვის Patriot-ის საჰაერო თავდაცვის სისტემების რაკეტების წარმოების ლიცენზიების გაცემას „დადებითად უყურებს“.
ამის შესახებ ზელენსკიმ ტრამპთან შეხვედრის შემდეგ ჟურნალისტებთან საუბრისას განაცხადა.
ზელენსკის თქმით, მან აშშ-ის პრეზიდენტს სთხოვა, უკრაინაში Patriot-ის რაკეტების წარმოების დაწყების პროცესი დააჩქაროს.
„ჩვენ პრეზიდენტს ვთხოვეთ, დაგვეხმაროს ამ პროცესის დაჩქარებაში. ის ლიცენზიებს დადებითად უყურებს“, - განაცხადა ზელენსკიმ.
მისივე თქმით, უკრაინულმა მხარემ მოლაპარაკებები გამართა Patriot-ის მწარმოებელ კომპანია RTX-თან (Raytheon) და კომპანიისგან მიიღო სიგნალი, რომ ასეთი თანამშრომლობისთვის მზად არის.
ზელენსკის განცხადებით, უკრაინაში Patriot-ის სისტემებისთვის რაკეტების წარმოების დაწყებას შესაძლოა დაახლოებით წელიწადი ან წელიწადნახევარი დასჭირდეს.
„ჩვენ ამ პროექტს დავიწყებთ. თუმცა, არ ვიცი, ამას ერთი წელი დასჭირდება თუ წელიწადნახევარი, მაგრამ ეს მომავლისთვის არის... უკრაინელებისთვის ჩვენ Patriot-ის სისტემები გვაქვს. ასეთი რაკეტების საკუთარი წარმოება დაგვჭირდება მაშინაც კი, როცა საკუთარ ანტისარაკეტო სისტემას ვაწარმოებთ. ნებისმიერ შემთხვევაში, Patriot-ის იმედი გვაქვს“, - განაცხადა უკრაინის პრეზიდენტმა.
