უკრაინის პრეზიდენტმა ვოლოდიმირ ზელენსკიმ ევროკომისიის პრეზიდენტ ურსულა ფონ დერ ლაიენთან უკრაინის თავდაცვისუნარიანობის საკითხები განიხილა.
ამის შესახებ ზელენსკიმ სოციალურ ქსელში დაწერა.
ზელენსკიმ ფონ დერ ლაიენს მადლობა გადაუხადა უკრაინისა და უსაფრთხოების საკითხებისადმი ყურადღებისთვის, რომელიც ევროკომისიის პრეზიდენტმა ევროპარლამენტში ყოველწლიურ მოხსენებაში გამოხატა.
მისივე თქმით, ევროკომისიის პრეზიდენტს მალე გაერო-ს გენერალური ასამბლეის ფარგლებში შეხვდება.
„ევროკომისიის პრეზიდენტ ურსულა ფონ დერ ლაიენთან საუბარი მქონდა. ის ძალიან პროდუქტიული იყო. ევროპარლამენტში ყოველწლიური მიმართვისთვის ურსულას მადლობა გადავუხადე უკრაინისა და უსაფრთხოების საკითხებზე ყურადღების გამახვილებისთვის. უკრაინისა და ევროკავშირის მიერ SAFE პროგრამიდან დარჩენილი თანხების ახალი თავდაცვის პროექტების უზრუნველსაყოფად გამოყენების ინიციატივა ძალიან დროული და ნამდვილად საჭიროა. მნიშვნელოვანია მისი განხორციელება. რა თქმა უნდა, ჩვენ მზად ვართ, ვითანამშრომლოთ უსაფრთხოების სხვა წინადადებებზე, რომლებსაც შეუძლიათ, მთელი ევროპისა და ჩვენი თითოეული ქვეყნის გაძლიერება. ჩვენ განვიხილეთ ჩვენი თავდაცვის მდგრადობისთვის აუცილებელი ნაბიჯები. ძალიან დეტალურად – უკრაინის თავდაცვის დაფინანსების პრობლემა. ჩვენ ვამზადებთ ამ პრობლემის გადაწყვეტას და შევთანხმდით, რომ შევხვდებით ნიუ იორკში, გაერო-ს გენერალური ასამბლეის ფარგლებში. გმადლობთ მხარდაჭერისთვის!“, – წერს ზელენსკი.
