„ქართულ ოცნებას“ სალაპარაკო არაფერი დარჩენია, გარდა იმისა, რომ ისტორიულ ექსკურსში გადაეშვან, ისიც პროპაგანდისტული მიზნით, - ასე გამოეხმაურა „ლელო-ძლიერი საქართველოს“ წევრი, ლანა გალდავა, პრემიერ-მინისტრის, ირაკლი კობახიძის დღეს გამართულ ბრიფინგს, სადაც მან „გეორგიევსკის ტრაქტატსა" და ერეკლე მეორეს გადაწყვეტილებაზე ისაუბრა.
გალდავას შეფასებით, იმ ფონზე, როდესაც საქართველოს სტრატეგიული პარტნიორობები შეჩერებულია, ქვეყანაში კი კორუფციის, ნეპოტიზმისა და მძიმე სოციალური პრობლემების საკითხები დგას, „ქართული ოცნების“ მიერ მსგავსი ბრიფინგების გამართვა პროპაგანდისტულ მიზანს ემსახურება.
„როდესაც შეჩერებულია სტრატეგიული პარტნიორობები, როდესაც ქვეყანა იხრჩობა კორუფციასა და ნეპოტიზმში, როდესაც ქვეყანაში არის ნარკოპანდემია, როდესაც ქვეყანაში არის უამრავი სოციალურად დაუცველი, მოსახლეობას არ აქვს ელემენტარულად ყოველდღიურად გადაადგილების, საჭმლის ფული, პენსიონერებს აქვთ არჩევანი იყიდონ მედიკამენტი თუ გადაიხადონ კომუნალური გადასახადი, ან იყიდონ ყოველდღიურად პური, ამ დროს, რა თქმა უნდა, „ქართული ოცნებისთვის“ საუკეთესო გამოსავალი არის ბელეტრისტიკა, რაღაც ახალი პროპაგანდისტული ბრიფინგების ჩატარება, არაფრის მთქმელი, რაც თავის მხრივ, კიდევ ერთხელ მიუთითებს, რომ „ქართულ ოცნებას“ სალაპარაკო არაფერი დარჩენია, გარდა იმისა, რომ ისტორიულ ექსკურსში გადაეშვან, ისიც პროპაგანდისტული მიზნით“, - განაცხადა ლანა გალდავამ.
