რუსეთის პრეზიდენტის პრესმდივანმა დმიტრი პესკოვმა, ყაზახეთის პრეზიდენტ ყასიმ-ჟომართ თოყაევის წინადადების საპასუხოდ, უკრაინის წინააღმდეგ რუსეთის ომის „გაყინვის“ შესახებ განაცხადა, რომ „გაყინვა შეუძლებელია“.
ამის შესახებ პესკოვმა „ინტერფაქსთან“ კომენტარში განაცხადა.
პესკოვის თქმით, კიევის პოზიციის გათვალისწინებით, „კონფლიქტის გაყინვა თავისთავად შეუძლებელია“.
„ჩვენთვის მთავარი პირობა არსებობს - უნდა მივაღწიოთ ჩვენს მიზნებს“, -განაცხადა კრემლის წარმომადგენელმა.
კითხვაზე, როგორ შეხვდა ვლადიმირ პუტინი თოყაევის ამ წინადადებას, პესკოვმა უპასუხა:
„მან (პუტინმა) მას დეტალურად მოუყვა ყველაფერი „სპეციალური სამხედრო ოპერაციის“ შესახებ“.
პუტინის პრესმდივანმა ასევე განაცხადა, რომ საბრძოლო მოქმედებების შეწყვეტის პირობები რუსეთის საგარეო საქმეთა სამინისტრომ ორი წლის წინ ჩამოაყალიბა.
„ეს ყველაფერი შეიძლება დღესვე, დღის ბოლომდე შეჩერდეს, თუ კიევის რეჟიმი შესაბამის გადაწყვეტილებებს მიიღებს“, - თქვა მან.
შეგახსენებთ, ყაზახეთის პრეზიდენტმა, ყასიმ-ჟომართ თოყაევმა რუსეთის პრეზიდენტ ვლადიმირ პუტინთან შეხვედრისას განაცხადა, რომ უკრაინასა და რუსეთს შორის კონფლიქტის „გაყინვის“ დროა.
