ნიკარაგუის პრეზიდენტმა დანიელ ორტეგამ განაცხადა, რომ ქვეყანაში არჩევნები აღარასდროს ჩატარდება. იუწყება Reuters.

ორტეგა, რომელიც პრეზიდენტის პოსტს 2007 წლიდან იკავებს, აცხადებს, რომ ეს ნაბიჯი აუცილებელია, რათა ოპოზიციამ არჩევნების გზით ხელისუფლების ხელში ჩაგდება ვერ შეძლოს.

„აქ არჩევნები აღარ ჩატარდება, რათა მათ [ოპოზიციამ] მთავრობისა და ხელისუფლების ხელში ჩაგდება ვეღარ სცადონ“, - განაცხადა ორტეგამ.

ამასთან, ორტეგას არ დაუკონკრეტებია, როგორ გაფორმდება არჩევნების გაუქმება სამართლებრივი თვალსაზრისით.

ნიკარაგუაში ბოლო საპრეზიდენტო არჩევნები 2021 წელს გაიმართა, გამარჯვებულად დანიელ ორტეგა გამოცხადდა. ოპოზიციური კანდიდატები პოლიტიკური დევნის ობიექტები გახდნენ.

კერძოდ, ორტეგას ერთ-ერთი მთავარი ოპონენტი, ფელიქს მარადიაგა, 2021-2023 წლებში პატიმრობაში იმყოფებოდა, რის შემდეგაც აშშ-ში გააძევეს. გარდა ამისა, კიდევ ექვსი საპრეზიდენტო კანდიდატი დააკავეს.

2018 წელს ნიკარაგუაში ანტისამთავრობო საპროტესტო აქციების ძალადობრივი დარბევის დროს 300-ზე მეტი ადამიანი დაიღუპა.

2025 წელს ორტეგამ კონსტიტუციაში ცვლილებები შეიტანა, რითაც თავისი საპრეზიდენტო ვადა კიდევ ექვსი წლით გაიხანგრძლივა და მეუღლე, როსარიო მურილიო, „თანაპრეზიდენტად“ დანიშნა.

აშშ ნიკარაგუის პოლიტიკურ რეჟიმს დიქტატურად მიიჩნევს. შეერთებულმა შტატებმა სანქციები 2 350-ზე მეტ ნიკარაგუელ მაღალჩინოსანს დაუწესა. გაერო-მაც არაერთხელ დაადანაშაულა ნიკარაგუის ხელისუფლება ადამიანის უფლებების სისტემურ დარღვევებში.

2022 წლის ოქტომბერში ნიკარაგუა იმ ხუთ სახელმწიფოს შორის იყო, რომლებმაც უარი თქვეს გაერო-ს გენერალური ასამბლეის რეზოლუციის მხარდაჭერაზე, რომელიც უკრაინის ტერიტორიების რუსეთის მიერ ანექსიას გმობდა.