რუსებმა ოდესის სანაპიროსთან, შავ ზღვაში, გვინეა-ბისაუს დროშის ქვეშ მცურავ სამოქალაქო გემს დაარტყეს, ხომალდს მარცვლეული გადაჰქონდა. დაიღუპა 5 ადამიანი, ეკიპაჟის კიდევ 5 წევრის ბედი უცნობია.
ამის შესახებ უკრაინის შეიარაღებული ძალების სამხედრო-საზღვაო ძალებმა განაცხადა.
„რუსმა ოკუპანტებმა სამოქალაქო მშრალტვირთიან გემ GOLDEN LEO-ს (გვინეა-ბისაუს დროშით, მფლობელი - თურქეთი) სამი ფრთოსანი რაკეტა Х-59/Х-69-ით დაარტყეს. თავდასხმის დროს გემი, რომელსაც მარცვლეული გადაჰქონდა, საბრძოლო მოქმედებების ზონას ტოვებდა.
რაკეტა გემის მარჯვენა ბორტის ზედა კონსტრუქციის მოხვდა, რის შედეგადაც ბორტზე ხანძარი გაჩნდა. თავდასხმას 5 ადამიანი ემსხვერპლა. ეკიპაჟის კიდევ 5 წევრის ბედი ამ დრომდე უცნობია, მათი სამძებრო-სამაშველო ოპერაცია გრძელდება. გემის ტექნიკური მდგომარეობა ზუსტდება,“ - აღნიშბულია განცხადებაში.
სამაშველო ოპერაციაში ჩართული იყვნენ უკრაინის შეიარაღებული ძალების სამხედრო-საზღვაო ძალების და საზღვაო სამძებრო-სამაშველო სამსახურის ქვედანაყოფები.
ეკიპაჟის რვა წევრი ევაკუირებულია და ოდესის ერთ-ერთ საავადმყოფოშია გადაყვანილი.
„ეს რუსეთის კიდევ ერთი მიზანმიმართული თავდასხმაა უცხოური დროშის ქვეშ მცურავ უიარაღო სამოქალაქო გემზე, რომელიც არავითარ სამხედრო საფრთხეს არ წარმოადგენდა. ეს თავდასხმა მშვიდობიანი საზღვაო ნაოსნობის წინააღმდეგ მიმართული ტერორისტული აქტია და საერთაშორისო ჰუმანიტარული სამართლის ნორმების უხეში დარღვევაა,“ - აცხადებენ უკრაინის სამხედრო-საზღვაო ძალებში.
