აშშ-ის პრეზიდენტმა დონალდ ტრამპმა ერისადმი მიმართვისას კვლავ გააჟღერა ბრალდებები 2020 წლის საპრეზიდენტო არჩევნებთან დაკავშირებით. პარალელურად, ვაშინგტონში გამოქვეყნდა მანამდე გასაიდუმლოებული დოკუმენტები ჩინეთის ქმედებების შესახებ, რომელიც ამერიკის არჩევნებს წინ უძღოდა. ამის შესახებ The Hill იუწყება.
ტრამპმა განაცხადა, რომ აშშ-ის დაზვერვამ უგულებელყო ინფორმაცია იმის შესახებ, რომ ჩინეთი 2020 წლის საპრეზიდენტო არჩევნების წინ, ამერიკელი ამომრჩევლების შესახებ მონაცემებს აგროვებდა მათ შორის - სახელებსა და პარტიულ კუთვნილებას.
„ჩინეთის სახალხო რესპუბლიკამ განახორციელა ის, რაც ისტორიაში არჩევნებთან დაკავშირებული მონაცემების ერთ-ერთ უდიდეს გაჟონვად ითვლება, რის შედეგადაც ჩინეთმა ფარულად მიიღო 220 მილიონი ამერიკელი ამომრჩევლის მონაცემები“, - განაცხადა ტრამპმა.
დონალდ ტრამპმა ასევე აღნიშნა, რომ სადაზვერვო სამსახურები „აქტიურად ცდილობდნენ ჩინეთის არჩევნებში ჩარევის მასშტაბების შესახებ ინფორმაციის დამალვასა და შემცირებას“, რის გამოც, მისი თქმით, ეს ინფორმაცია დაუმალეს როგორც პრეზიდენტს, ისე ამერიკელ ხალხს.
„ჩვენ ამ ინფორმაციას ვავრცელებთ არა არჩევნებისადმი ნდობის შესარყევად, არამედ ამ ნდობის გასაძლიერებლა, ჩვენი მოწყვლადი ადგილების გამოვლენითა და მათი ძალიან, ძალიან სწრაფად აღმოფხვრით“, - განაცხადა ტრამპმა.
CNN-ი ინფორმაციით, თეთრი სახლის მიერ გამოქვეყნებული დოკუმენტები აღწერს, თუ როგორ ცდილობდნენ ჩინელი ჰაკერები ამერიკელი მაღალჩინოსნების თვალთვალს.
კერძოდ, ერთ-ერთი ჰაკერული ჯგუფი ცდილობდა ჯო ბაიდენის საარჩევნო შტაბის თანამშრომლების ელექტრონული ფოსტის მისამართების მოპოვებას შესაძლო შემდგომი მოქმედებებისთვის. ასევე საუბარია სხვადასხვა შტატში ამერიკელი ამომრჩევლების მონაცემების აქტიურ შეგროვებაზე. დოკუმენტებში არ არის მითითება, რომ ჩინეთმა ეს მონაცემები რაიმე ფორმით აქტიურად გამოიყენა, საუბარია მხოლოდ სადაზვერვო ანალიტიკოსების ვარაუდებზე, თუ როგორ შეიძლებოდა მათი გამოყენება.
როგორც მედია აღნიშნავს, აშშ-ის დაზვერვა უკვე მრავალი წელია ავრცელებს გაფრთხილებას, რომ ჩინეთს აქვს დეტალური ინფორმაცია ასობით მილიონი ამერიკელის შესახებ.
