6 ივლისის საღამოს ირანელმა სამხედროებმა ჰორმუზის სრუტის სიახლოვეს მიმავალ კომერციულ გემს რაკეტა ესროლეს.
ამის შესახებ Axios ოფიციალურ პირებზე დაყრდნობით იუწყება.
ინციდენტი ომანის სანაპირო დასახლება ლიმადან რვა საზღვაო მილის აღმოსავლეთით მოხდა. ჭურვი ტანკერის მარცხენა ბორტს მოხვდა, რის შედეგადაც ხანძარი გაჩნდა.
შემთხვევის შედეგად არავინ დაშავებულა და გარემოსთვის ზიანი არ დაფიქსირებულა. ინციდენტის გამოძიება გრძელდება.
ამასთან, Axios-თან საუბარში ორმა ამერიკელმა მაღალჩინოსანმა განაცხადა, რომ თავდასხმის სამიზნე ორი ტანკერი იყო.
გამოცემის შეფასებით, ამ ინციდენტმა შესაძლოა საფრთხე შეუქმნას ურთიერთგაგების მემორანდუმს, რომელსაც მხარეებმა სამი კვირის წინ მოაწერეს ხელი და რომლის მიხედვითაც ირანი ჰორმუზის სრუტეში გემებზე თავდასხმების შეწყვეტას დათანხმდა.
