უკრაინის პრეზიდენტმა ვოლოდიმირ ზელენსკიმ რუსეთის მიერ უკრაინაზე განხორციელებული მასშტაბური თავდასხმის შემდეგ განაცხადა, რომ აშშ-ის პრეზიდენტ დონალდ ტრამპის მხრიდან ელოდება დადებით პასუხს Patriot-ის რაკეტების წარმოების ლიცენზიებთან დაკავშირებით.
ზელენსკის თქმით, საჰაერო თავდაცვის გაძლიერება უნდა გახდეს როგორც ნატო-ს მომავალი სამიტის, ისე სხვა საერთაშორისო მოლაპარაკებების ერთ-ერთი მთავარი შედეგი.
„თუ, რა თქმა უნდა, ნატო მოკავშირეებისთვის ჯერ კიდევ რამეს ნიშნავს, ევროპას უნდა ჰქონდეს საკუთარი, საკმარისი შესაძლებლობები, რათა დაიცვას თავი ყველა სახის საფრთხისგან, მათ შორის რუსეთის ბალისტიკური რაკეტებისგან,“ - განაცხადა ზელენსკიმ.
უკრაინის პრეზიდენტმა აღნიშნა, რომ Patriot-ის წარმოების ლიცენზიებთან დაკავშირებით მოლაპარაკებები ამერიკულ ადმინისტრაციასთან უკვე დიდი ხანია მიმდინარეობს.
ამასთან, ზელენსკიმ მადლობა გადაუხადა ყველა იმ ქვეყანას, რომლებიც უკრაინას PURL-ის პროგრამის ფარგლებში ეხმარებიან. ეს პროგრამა უკრაინას საშუალებას აძლევს შეიძინოს საჰაერო თავდაცვისთვის საჭირო რაკეტები, მათ შორის Patriot-ის სისტემებისთვის.
„თუმცა, ადამიანების სიცოცხლის საიმედოდ დასაცავად საჭიროა საკუთარი წარმოება. ევროპული წარმოება აქ, უკრაინაში, ან პარტნიორებთან ერთად, რა თქმა უნდა, საჭიროების შემთხვევაში, შეერთებულ შტატებსაც დაეხმარებოდა შესაბამისი ოპერაციების განხორციელებაში. ძალიან ვიმედოვნებთ, რომ პრეზიდენტ ტრამპისგან დადებით პასუხს მივიღებთ, რათა ადამიანების სიცოცხლე დავიცვათ“, - განაცხადა ვოლოდიმირ ზელენსკიმ.
