პაკისტანის განცხადებით, ქვეყნის უსაფრთხოების ძალებმა პაკისტან-ავღანეთის საზღვართან სახმელეთო ოპერაცია და საჰაერო დარტყმები განახორციელეს, რის შედეგადაც 29 მებრძოლი დაიღუპა.
ამის შესახებ Associated Press იუწყება.
პაკისტანის არმიის ცნობით, ოპერაცია ჩატარდა ქვეყნის ჩრდილო-დასავლეთ ნაწილში, ავღანეთის საზღვართან მდებარე რეგიონში, სადაც, სამხედროების ინფორმაციით, შეიარაღებული დაჯგუფებების სამალავები იყო განთავსებული.
სამხედრო უწყების განცხადებით, ოპერაციის ფარგლებში სახმელეთო ძალებმა და ავიაციამ ერთობლივად მიიტანეს იერიში რამდენიმე ობიექტზე. პაკისტანის ოფიციალური მონაცემებით, დაიღუპა 29 მებრძოლი, ხოლო უსაფრთხოების ძალებს შორის მსხვერპლი არ ყოფილა.
უწყების განცხადებით, ოპერაცია მას შემდეგ ჩატარდა, რაც პაკისტანში ბოლო დღეებში უსაფრთხოების ძალებზე რამდენიმე თავდასხმა განხორციელდა. ხელისუფლება ამ თავდასხმებში ავღანეთის ტერიტორიაზე მოქმედ შეიარაღებულ დაჯგუფებებს ადანაშაულებს.
პაკისტანი აცხადებს, რომ ავღანეთის ტერიტორიას ხშირად იყენებენ მებრძოლები პაკისტანში თავდასხმების დასაგეგმად, რასაც ქაბული უარყოფს და ამბობს, რომ არ დაუშვებს საკუთარი ტერიტორიის გამოყენებას სხვა ქვეყნების წინააღმდეგ.
Associated Press-ის ინფორმაციით, ბოლო თვეებში პაკისტან-ავღანეთის საზღვარზე ვითარება მნიშვნელოვნად გამწვავდა და მსგავსი სამხედრო ოპერაციები გახშირდა.
