გერმანიის კანცლერმა ფრიდრიხ მერცმა განაცხადა, რომ ახლა მხოლოდ ვლადიმირ პუტინზეა დამოკიდებული, დათანხმდება თუ არა უკრაინის პრეზიდენტ ვოლოდიმირ ზელენსკის მიერ შეთავაზებულ მოლაპარაკებებს.
ბუნდესტაგში გამოსვლისას მერცმა აღნიშნა, რომ ზელენსკიმ ჯერ კიდევ 4 ივნისს მიმართა რუსეთის ლიდერს და მოლაპარაკებების გამართვა შესთავაზა.
„მსურს კიდევ ერთხელ ძალიან მკაფიოდ ვთქვა: უკრაინის მხრიდან არსებობს კონკრეტული შეთავაზება მოლაპარაკებების გასამართად. უკრაინის პრეზიდენტმა 4 ივნისს წერილი მისწერა რუსეთის ლიდერს და მოუწოდა, მზად ყოფილიყო მოლაპარაკებებისთვის“, - განაცხადა მერცმა.
მისი თქმით, ზელენსკის ერთადერთი პირობა იყო, რომ შეხვედრა მოსკოვში არ ჩატარებულიყო.
„პუტინმა ამ შეხვედრაზე უარი თქვა, ამიტომ ახლა მხოლოდ მასზეა დამოკიდებული გადაწყვეტილება - დათანხმდება ამ შეთავაზებას თუ არა“, - აღნიშნა გერმანიის კანცლერმა.
შეგახსენებთ, რომ ვოლოდიმირ ზელენსკიმ განაცხადა, რომ საფრანგეთში გამართულ G7-ის სამიტზე ვლადიმირ პუტინთან შეხვედრას და ომის დასრულებაზე მოლაპარაკებებს სთავაზობდა, თუმცა რუსეთის მხარე „დიალოგისთვის მზად არ იყო“.
4 ივნისს უკრაინის პრეზიდენტმა კრემლის ლიდერს წერილი გაუგზავნა, რომელშიც ომის დასრულების მიზნით პირისპირ ორმხრივი შეხვედრის გამართვა შესთავაზა. ამასთან, ზელენსკიმ აღნიშნა, რომ მოლაპარაკებების პროცესში ევროპისა და აშშ-ის ჩართვაც აუცილებელია.
აშშ-ის პრეზიდენტმა დონალდ ტრამპმა უკრაინისა და რუსეთის ლიდერების ორმხრივი შეხვედრის შესაძლებლობას მხარდაჭერა გამოუცხადა.
თავის მხრივ, პუტინმა განაცხადა, რომ ზელენსკის ღია წერილს გაეცნო, თუმცა „შეხვედრის ჩატარების აზრს ვერ ხედავს“.
