22 ივნისიდან ბელარუსში არსებულმა სისტემებმა, რომლებიც უკრაინაში რუსეთს „შაჰედის“ უპილოტო აპარატების სამიზნეებისკენ წარმართვაში ეხმარებოდა, ფუნქციონირება შეწყვიტა, – ამის შესახებ უკრაინის პრეზიდენტმა, ვოლოდიმირ ზელენსკიმ ჟურნალისტებთან საუბრისას განაცხადა.
“არსებული ინფორმაციით, რომელიც მომაწოდა მთავარსარდალმა, ასევე, დაზვერვამ, 22 ივნისს შესაბამისმა რეტრანსლატორებმა ბელარუსის ტერიტორიაზე მუშაობა შეწყვიტეს.
მოახდინეს თუ არა მათი დემონტაჟი, მე, სიმართლე გითხრათ, ჯერ არ ვიცი. მაგრამ ვმუშაობთ ამაზე, და ძალიან ყურადღებით ვაკვირდები ვითარებას და ყოველდღიურად ვიღებ ანგარიშებს. ფაქტია, რომ დღეისთვის რეტრანსლატორები არ მუშაობენ”, - განაცხადა ზელენსკიმ.
19 ივნისს ზელენსკიმ განაცხადა, რომ ბელარუსის ლიდერს, ალექსანდრ ლუკაშენკას, ერთი კვირა ჰქონდა რუსული სისტემების ასაღებად. მისი ცნობით, ასეთი სადგურები უკრაინის მოსაზღვრე ბელარუსის ორ რეგიონში იყო განლაგებული. უკრაინის პრეზიდენტმა ასევე განაცხადა, რომ თუ ლუკაშენკო ამას არ გააკეთებდა, უკრაინა საპასუხო ზომებს მიიღებდა. ზელენსკიმ მოგვიანებით ასევე აღნიშნა, რომ ბელარუსის ტერიტორიაზე არსებობს საწარმოები, რომლებიც ხელს უწყობენ რუსეთის აგრესიას. რუსეთში, ამ განცხადებების შემდეგ, უკრაინას ბრალი დასდეს ბელარუსის ომში ჩათრევის მცდელობაში.
