„ბატონი კირ სტარმერი იყო დაქირავებული ადამიანებისა და ჯგუფების მიერ, ძალიან ბევრი ბინძური საქმე გააკეთებინეს, ხოლო შემდეგ, როდესაც უკვე აღარ დასჭირდათ, მას გადადგომა მოსთხოვეს“, - ამის შესახებ ფრაქცია „ქართული ოცნების“ თავმჯდომარის პირველმა მოადგილემ ლევან მაჭავარიანმა პარლამენტის პლენარულ სხდომაზე განაცხადა.
მისი თქმით, დიდი ბრიტანეთის პრემიერ-მინისტრის კირ სტარმერის გადადგომა, კიდევ ერთი მაგალითია იმისა, თუ როგორ ახდენენ გავლენას „არაფორმალური ოლიგარქიული ძალები“, ე.წ. „გლობალური ომის პარტია“ და „დიპსტეითი“ ევროპის წამყვანი ქვეყნების პოლიტიკურ პროცესებზე. მისი შეფასებით, სტარმერი ბრიტანელი ხალხის ნდობით არ სარგებლობდა, რასაც მისი დაბალი რეიტინგიც ადასტურებდა.
ლევან მაჭავარიანმა ასევე ისაუბრა საქართველოსთან მიმართებით დიდი ბრიტანეთის მიერ მიღებულ გადაწყვეტილებებსა და განცხადებებზე. როგორც მან აღნიშნა, ბრიტანეთის ხელისუფლებისა და მედიასაშუალებების მხრიდან საქართველოს შესახებ გავრცელებული შეფასებები საფუძველს მოკლებულია.
„ბატონი სტარმერის პირობებში ჩვენ შეგვიძლია გავიხსენოთ საქართველოსთან მიმართებით მიღებული უკიდურესად სასაცილო გადაწყვეტილებები, როდესაც დამოუკიდებელი ტელეკომპანიები - „იმედი“ და „პოსტივი“ დაასანქცირა ბრიტანეთის მთავრობამ და ამის მიზეზად ის მოიყვანეს, რომ თითქოს ამ ტელევიზიების მეშვეობით ხდება უკრაინის სუვერენიტეტის ხელყოფა. ალბათ, პატარა ბავშვიც არ დაიჯერებს იმ ნარატივს, თითქოს ჩვენმა ხელისუფლებამ მოქალაქეების დასაშლელად პირველი მსოფლიო ომის დროს აკრძალული ნივთიერება გამოიყენა. ფიზიკურად მოწამლული ადამიანიც არ არსებობს“, - განაცხადა ლევან მაჭავარიანმა.
მისივე თქმით, საქართველოს ხელისუფლება ეროვნული ინტერესების დაცვას აგრძელებს და არ აპირებს ქვეყნის კურსის შეცვლას.
„ჩვენ ერთი ნაბიჯით უკან ვერ დაგვახევინეს და არ მივეცით არავის უფლება, რომ საქართველო გამოეყენებინათ პროქსი სახელმწიფოდ, ისევე როგორც, სამწუხაროდ, გამოიყენეს უკრაინა. ჩვენი ხალხის გვერდში დგომით ამ გზას გავაგრძელებთ, ერთი ნაბიჯითაც უკან არ დავიხევთ და ვიქნებით მშვიდობისა და სტაბილურობის გარანტი საქართველოში“, - განაცხადა ლევან მაჭავარიანმა.
