სააგენტოს Reuters-ის ინფორმაციით, აშშ-სა და ირანს შორის მოსალოდნელი ჩარჩო-შეთანხმება ითვალისწინებს ირანის ეკონომიკაში 300 მილიარდი დოლარის საინვესტიციო ფონდის შექმნას.
ფონდი, რომელიც უნდა ჩამოყალიბდეს ურთიერთგაგების მემორანდუმის ხელმოწერის შემდეგ, მიზნად ისახავს მხარეებისთვის ეკონომიკური სტიმულის შექმნას საბოლოო შეთანხმების მისაღწევად, მათ შორის ირანის ბირთვულ პროგრამასთან დაკავშირებულ საკითხებზე.
წყაროების მიხედვით, ეს იქნება კერძო საინვესტიციო მექანიზმი და არა სახელმწიფო ბიუჯეტიდან დაფინანსებული პროგრამა ან რეპარაციების სქემა. მასში მონაწილეობას შეძლებენ კომპანიები აშშ-დან, სპარსეთის ყურის ქვეყნებიდან, აზიიდან, სამხრეთ ამერიკიდან და აფრიკიდან.
როგორც Reuters აღნიშნავს, უკვე დაახლოებით თანხის ნახევარზე მეტი ინვესტორებისგან წინასწარ არის მობილიზებული და პროექტი მოიცავს ენერგეტიკას, ლოჯისტიკასა და ტრანსპორტს.
ირანული წყაროს თქმით, თავდაპირველად თეირანი აშშ-სგან 400 მილიარდ დოლარს ითხოვდა ომის ზიანის კომპენსაციის სახით, თუმცა ვაშინგტონმა უარი განაცხადა პირდაპირ დაფინანსებაზე. ამის შემდეგ გაჩნდა იდეა „რეკონსტრუქციისა და განვითარების ფონდის“ შესახებ.
გეგმის მიხედვით, რეგიონის ქვეყნები პროექტებს დააფინანსებენ სესხებით, საკრედიტო ხაზებით ან პირდაპირი ინვესტიციებით, მათ შორის დაზიანებული ობიექტების აღსადგენად, მათ შორის, „მობარაქეს“ მეტალურგიული კომპლექსის, ნავთობგადამამუშავებელი ქარხნებისა და აეროპორტების.
ფონდი ამოქმედდება მხოლოდ იმ შემთხვევაში, თუ ვაშინგტონი და თეირანი საბოლოო შეთანხმებას მიაღწევენ. არსებული მემორანდუმი კი ითვალისწინებს 60-დღიან მოლაპარაკებების პროცესს საბოლოო შეთანხმების მისაღწევად.
აშშ-ის პრეზიდენტმა დონალდ ტრამპმა უკვე განაცხადა, რომ ირანთან შეთანხმება მიღწეულია მემორანდუმის დონეზე და დეტალებს უახლოეს დღეებში გაასაჯაროებს.
