უკრაინის პრეზიდენტმა ვოლოდიმირ ზელენსკიმ განაცხადა, რომ "დიდი შვიდეულის" ყველა წევრი ქვეყანა ერთხმად უჭერს მხარს უკრაინას და მიიჩნევს, რომ რუსეთს ომის დასრულება არ სურს, ამიტომ მოსკოვზე ზეწოლა სანქციების მეშვეობით უნდა გაძლიერდეს.
ზელენსკის თქმით, ლიდერებთან შეხვედრისას ყველა ქვეყანამ დაგმო რუსეთის მიერ სამოქალაქო ინფრასტრუქტურაზე, მშვიდობიან მოსახლეობასა და კიევ-პეჩერის ლავრაზე განხორციელებული დარტყმები.
„ჩემი აზრით, ძალიან მნიშვნელოვანი სიგნალია, რომ "დიდი შვიდეულის" ყველა ქვეყანა სრულად უჭერს მხარს უკრაინას. ყველამ დაგმო დარტყმები სამოქალაქო ინფრასტრუქტურაზე, ჩვენს ხალხზე და ლავრაზე“, - განაცხადა ზელენსკიმ.
მისივე თქმით, მან ლიდერებს თავდასხმების ამსახველი ფოტოები აჩვენა, მათ შორის ხანძრებისა და სამაშველო სამუშაოების კადრები.
უკრაინის პრეზიდენტმა ასევე აღნიშნა, რომ "დიდი შვიდეულის" ლიდერები ვერ ხედავენ რუსეთის პრეზიდენტ ვლადიმირ ზელენსკის მხრიდან ომის დასრულების სურვილს.
„ყველა მიიჩნევს, რომ ომი უნდა შეჩერდეს. ყველა ფიქრობს, რომ პუტინს ომის დასრულება არ სურს, მაგრამ საჭიროა მისი იძულება - პირველ რიგში სანქციების გზით. ამის შესახებ ყველა ქვეყანა საუბრობდა“, - განაცხადა ზელენსკიმ.
უკრაინის პრეზიდენტმა განაცხადა, რომ "დიდი შვიდეულის" ყველა ქვეყანა არა მხოლოდ უკრაინის მხარდაჭერას ადასტურებს, არამედ ქვეყნის თავდაცვის შესაძლებლობების შემდგომ გაძლიერებაზეც მუშაობს.
„აბსოლუტურად სრულად "დიდი შვიდეული" იმუშავებს ჩვენი თავდაცვის კიდევ უფრო გასაძლიერებლად“, - აღნიშნა ზელენსკიმ.
მისივე თქმით, თუ რუსეთთან ომი გაგრძელდება, „დიდი შვიდეულის“ ქვეყნები უკრაინას მომავალი ზამთრის გადატანაშიც დაეხმარებიან, მათ შორის ენერგეტიკული უსაფრთხოებისა და კრიტიკული ინფრასტრუქტურის მხარდაჭერის მიმართულებით.
ზელენსკიმ ასევე ისაუბრა აშშ-ის პრეზიდენტთან გამართულ შეხვედრაზე. მისი თქმით, მხარეებმა განიხილეს უკრაინისთვის ანტიბალისტიკური სისტემებისა და რაკეტების წარმოების ლიცენზიის მიღების საკითხი.
ზელენსკის განცხადებით, უკრაინა ცდილობს საკუთარი თავდაცვითი ინდუსტრიის შესაძლებლობების გაფართოებას, რათა ქვეყნის საჰაერო თავდაცვა კიდევ უფრო გაძლიერდეს რუსეთის სარაკეტო და დრონებით თავდასხმების ფონზე.
