უნგრეთის პრემიერ-მინისტრმა პეტერ მადიარმა განაცხადა, რომ უნგრეთმა უკრაინასთან მიაღწია „ყოვლისმომცველ შეთანხმებას“ უნგრული ეროვნული უმცირესობის საკითხზე.
წყაროების ცნობით, 3 ივნისს მადიარმა აღნიშნა, რომ მისმა მთავრობამ სამ კვირაში შეძლო ის, რაც ყოფილი პრემიერის ვიქტორ ორბანის გუნდმა ათი წლის განმავლობაში ვერ შეძლო.
მისი თქმით, შეთანხმება ითვალისწინებს დაახლოებით 100-ათასიანი უნგრული უმცირესობის ენობრივი, საგანმანათლებლო, კულტურული და პოლიტიკური უფლებების გაფართოებას.
„ჩვენ მივაღწიეთ ყოვლისმომცველ შეთანხმებას უკრაინასთან უნგრული უმცირესობის უფლებების გაფართოებაზე“, - განაცხადა მადიარმა.
მადიარმა აღნიშნა, რომ შეთანხმება რამდენიმე კვირის განმავლობაში მიმდინარე ექსპერტული დონის მოლაპარაკებების შედეგია, რომელშიც მონაწილეობდნენ უკრაინისა და უნგრეთის წარმომადგენლები, ასევე ზაკარპატიეში მცხოვრები უნგრული თემის პოლიტიკური ორგანიზაციები და ეკლესიები.
მისივე თქმით, უკრაინის მთავრობამ აიღო ვალდებულება, უახლოეს პერიოდში შეთანხმებული ზომები კანონმდებლობაში ასახოს, რაც უნგრულ თემს ზაკარპატიეში „უფრო ფართო საგანმანათლებლო, კულტურულ, ენობრივ და პოლიტიკურ უფლებებს“ მისცემს, ვიდრე აქამდე ჰქონდა.
მისი თქმით, ეს ვალდებულებები უკრაინის მხრიდან ასევე აისახება ევროკავშირთან დაკავშირებულ სამოქმედო გეგმაში.
„თუ ეს განხორციელდება, უნგრეთის მთავრობა მხარს დაუჭერს უკრაინის ევროკავშირში გაწევრიანების მოლაპარაკებების პირველი ეტაპის გახსნას“, - თქვა მადიარმა.
