CBS News-ის ინფორმაციით, აშშ-ის პრეზიდენტ დონალდ ტრამპის ადმინისტრაცია ემზადება ირანზე ახალი სამხედრო დარტყმებისთვის, პარალელურად კი დიპლომატიური მოლაპარაკებები კვლავ გრძელდება
წყაროს ცნობით, ამ ეტაპზე საბოლოო გადაწყვეტილება დარტყმების განხორციელების შესახებ მიღებული არ არის.
ამასთან, გამოცემის ინფორმაციით, აშშ-ის სამხედრო და სადაზვერვო უწყებების ნაწილმა უქმეებთან დაკავშირებული გეგმები გადადო, ირანზე შესაძლო დარტყმების მოლოდინის ფონზე.
თავდაცვისა და სადაზვერვო სტრუქტურებმა ასევე დაიწყეს საზღვარგარეთ მდებარე ამერიკული ობიექტებიდან პერსონალის შესაძლო გაყვანის სიების განახლება, რადგან ახლო აღმოსავლეთში განლაგებული დანაყოფები რეგიონის დატოვების პროცესში არიან. ეს ნაბიჯი უკავშირდება ირანის შესაძლო საპასუხო დარტყმის რისკების შეფასებას.
CBS News-ის თანახმად, აპრილის დასაწყისში ძალაში შესული დროებითი ცეცხლის შეწყვეტის შემდეგ, აშშ და ირანი ძირითადად თავს იკავებდნენ სამხედრო მოქმედებებისგან, რაც არაპირდაპირი მოლაპარაკებების გაგრძელების საშუალებას იძლეოდა.
თეთრი სახლის პრესმდივანმა ანა კელიმ CBS News-ს განუცხადა, რომ დონალდ ტრამპმა „მკაფიოდ განსაზღვრა თავისი წითელი ხაზები“ - ირანი არასდროს უნდა ფლობდეს ბირთვულ იარაღს და არ შეიძლება ჰქონდეს გამდიდრებული ურანის მარაგი.
კელის თქმით, პრეზიდენტი „ყოველთვის იტოვებს მოქმედების ყველა ვარიანტს“ და პენტაგონის ამოცანაა მზად იყოს ნებისმიერი გადაწყვეტილების შესასრულებლად, რომელსაც მთავარსარდალი მიიღებს. მისი განცხადებით, ტრამპმა მკაფიოდ დააფიქსირა ის შედეგები, რაც ირანს ელოდება, თუ შეთანხმება არ შედგება.
მანამდე გავრცელებული ინფორმაციით, ტრამპმა პარასკევს ეროვნული უსაფრთხოების მაღალი თანამდებობის პირებთან შეხვედრა გამართა, სადაც ირანთან ომის კონტექსტში შემდგომი ნაბიჯები განიხილებოდა.
ასევე ცნობილია, რომ მან გააუქმა ვიზიტი ნიუ-ჯერსიში მდებარე გოლფ-კურორტზე და არ დაესწრო შვილის ქორწილს ბაჰამის კუნძულებზე და ვაშინგტონში დარჩენა არჩია „სამთავრობო გარემოებებისა და აშშ-ის სიყვარულის“ მოტივით.
შეგახსენებთ, პარასკევს თეირანში ჩავიდა კატარის მომლაპარაკებლების დელეგაცია, რომელიც აშშ-სთან შეთანხმებით ცდილობს ირანთან შეთანხმების მიღწევას და გადაუჭრელი საკითხების დარეგულირებას.
