მოლდოვის პრეზიდენტმა მაია სანდუმ განაცხადა, რომ რუსეთის პრეზიდენტის ვლადიმირ პუტინის ბრძანება, რომელიც დნესტრისპირეთის არაღიარებული რეგიონის მცხოვრებლებისთვის რუსეთის მოქალაქეობის გამარტივებული წესით მინიჭებას ითვალისწინებს, შესაძლოა, გამოყენებულ იქნას უკრაინის წინააღმდეგ ომში მოლდოვის მოქალაქეების მობილიზაციისთვის.
ინფორმაციას Politico ავრცელებს.
სანდუს თქმით, „სავარაუდოდ, რუსეთს მეტი ადამიანი სჭირდება, რათა ისინი უკრაინის წინააღმდეგ ომში გაგზავნოს“.
მისივე შეფასებით, ეს შეიძლება იყოს რუსეთის ერთ-ერთი ტაქტიკა, რომელიც მოლდოვაზე ზეწოლას ისახავს მიზნად, განსაკუთრებით დნესტრისპირეთის რეინტეგრაციის პროცესის ფონზე.
„უკრაინაში ომის დაწყების შემდეგ ამ რეგიონის მოსახლეობის უმეტესობამ მოლდოვის მოქალაქეობა მიიღო, რადგან მიიჩნევდნენ, რომ მოლდოვის რესპუბლიკის მოქალაქეობა მათ რუსეთის მოქალაქეობასთან შედარებით მეტ უსაფრთხოებას უზრუნველყოფდა“, - განაცხადა სანდუმ.
კითხვაზე, შეუძლია თუ არა პუტინს მოლდოვის ევროკავშირში გაწევრიანების დაბლოკვა დნესტრისპირეთის საკითხის გამოყენებით, სანდუმ აღნიშნა, რომ „მხოლოდ ევროკავშირი წყვეტს, გახდება თუ არა მოლდოვა მისი წევრი და რუსეთი ამ პროცესში არაფერ შუაშია“.
შაბათს, 16 მაისს ვლადიმირ პუტინმა გამოსცა ბრძანება, რომელიც დნესტრისპირეთის არაღიარებული რეგიონის მცხოვრებლებისთვის რუსეთის მოქალაქეობის გამარტივებულ წესით მინიჭებას ითვალისწინებს.
