შაბათს, დაახლოებით დილის 06:30 საათზე, თურქეთის ქალაქ სამსუნში უპილოტო საფრენი აპარატი ჩამოვარდა. ინფორმაციას თურქული მედია ავრცელებს.
ინციდენტის შედეგად სულ მცირე სამი საცხოვრებელი სახლი დაზიანდა. აფეთქების ხმამ ადგილობრივ მოსახლეობაში პანიკა გამოიწვია, რადგან თავდაპირველად ბევრმა ის ბუნებრივი აირის აფეთქებად მიიჩნია.
დაშავებულები არ არიან.
მოქალაქეების შეტყობინებების შემდეგ შემთხვევის ადგილზე პოლიციის, სახანძრო და სასწრაფო დახმარების ჯგუფები მივიდნენ.
სამართალდამცველებმა ტერიტორია შემოსაზღვრეს და დრონის მიმოფანტილი ნაწილები შეაგროვეს. არსებული ინფორმაციით, აპარატი დაახლოებით 25 კილოგრამს იწონიდა.
ნამსხვრევები ტექნიკური ექსპერტიზისთვის პოლიციის სპეციალურ ობიექტზე გადაიტანეს.
გამომძიებლების განცხადებით, დრონის წარმომავლობა და ჩამოვარდნის მიზეზი ტექნიკური ექსპერტიზის დასრულების შემდეგ დადგინდება.
