პოლონურმა სამხედრო ავიაციამ ბალტიის ზღვის თავზე რუსული სადაზვერვო თვითმფრინავი ილ-20 ჩაჭრა.
ამის შესახებ პოლონეთის ვიცე-პრემიერმა და თავდაცვის მინისტრმა ვლადისლავ კოსინიაკ-კამიშმა სოციალურ ქსელ X-ზე დაწერა.
მინისტრის ინფორმაციით, რუსული თვითმფრინავი საერთაშორისო წყლების თავზე ფრენის გეგმის გარეშე და გამორთული ტრანსპონდერებით დაფრინავდა.
„ჩვენმა ავიაციამ ბალტიის ზღვის საერთაშორისო წყლების თავზე რუსული სადაზვერვო ილ-20 ჩაჭრა“, – აღნიშნა კოსინიაკ-კამიშმა.
მისივე თქმით, გამორთული ტრანსპონდერებით შესრულებული ფრენები სამოქალაქო და სამხედრო ავიაციისთვის საფრთხეს ქმნის.
„ამ ტიპის ნებისმიერ პროვოკაციას ჩვენი პილოტების მხრიდან დაუყოვნებლივი რეაგირება მოჰყვება“, – განაცხადა პოლონეთის თავდაცვის მინისტრმა.
კოსინიაკ-კამიშის თქმით, ეს რუსეთის მორიგი მცდელობაა, შეამოწმოს NATO-ს ქვეყნების საჰაერო თავდაცვის სისტემების მზადყოფნა. ამასთან, პოლონეთის შეიარაღებული ძალების ოპერატიულმა სარდლობამ დაადასტურა, რომ ქვეყნის საჰაერო სივრცე არ დარღვეულა.
