აშშ-ის პრეზიდენტმა დონალდ ტრამპმა განაცხადა, რომ ირანის მიერ შეთავაზებული კონფლიქტის მოგვარების ახალი წინადადება მისთვის მიუღებელია.
„მათ სურთ შეთანხმების დადება, მაგრამ მე არ ვარ კმაყოფილი (წინადადებით)“, – განაცხადა დონალდ ტრამპმა ჟურნალისტების კითხვებზე პასუხისას .
ცნობილია, რომ ხუთშაბათს ირანმა პაკისტანის შუამავლობით შეერთებულ შტატებს განახლებული წინადადებები გადასცა ომის დასრულების შესახებ შეთანხმებისთვის.
აშშ-ის პრეზიდენტმა განაცხადა, რომ ამ წინადადებებით უკმაყოფილოა, თუმცა ხედავს, რომ თეირანი შეთანხმების მიღწევას ცდილობს.
„მათ სურთ შეთანხმების დადება, მაგრამ არ ვიცი... ეს არ მაკმაყოფილებს, ამიტომ ვნახოთ, რა მოხდება. ირანს სურს შეთანხმება, რადგან მათ, ფაქტობრივად, უკვე აღარ დარჩათ შეიარაღებული ძალები“, – განაცხადა ტრამპმა.
კითხვაზე, აპირებს თუ არა თავისი წარმომადგენლების გაგზავნას პაკისტანის დედაქალაქში მოლაპარაკებების მორიგ რაუნდზე, ტრამპმა აღნიშნა, რომ ამ ეტაპზე მოლაპარაკებები სატელეფონო რეჟიმში მიმდინარეობს.
„ჩვენ დიდ პატივს ვცემთ პაკისტანს და ისლამაბადს, ასევე პრემიერ-მინისტრსა და ფელდმარშალს, და ისინი თანამშრომლობენ ჩვენთან… მაგრამ ეს ძალიან გრძელი გზაა და ამ ეტაპზე ყველაფერს ვაკეთებთ მოლაპარაკებებისთვის, ახლა ეს ხდება ტელეფონით“, – განაცხადა მან.
ტრამპის თქმით, მოლაპარაკებებში „მნიშვნელოვანი პროგრესიც“ იქნა მიღწეული, თუმცა იგი არ არის დარწმუნებული, მიაღწევს თუ არა ეს პროცესი საბოლოო შედეგს, რადგან, მისი შეფასებით, ირანის ხელმძღვანელობა კვლავ „გაყოფილია“.
