გარემოს დაცვისა და სოფლის მეურნეობის მინისტრმა დავით სონღულაშვილმა სოფლის მეურნეობის განვითარების სახელმწიფო ხედვასა და აგროსექტორის მხარდაჭერის მასშტაბურ რეფორმაზე ისაუბრა.
მისი თქმით, რეფორმის ერთ-ერთი მთავარი ძლიერი მხარე მონიტორინგის სისტემის გაძლიერებაა, რაც თითოეული პროექტის უფრო ეფექტიან და წარმატებულ განხორციელებას უზრუნველყოფს.
„ფაქტობრივად, ამ პროგრამისა და რეფორმის ერთ-ერთი მთავარი ძლიერი მხარე არის მონიტორინგის სისტემის გაძლიერება. ხშირად გვქონია შემთხვევები, როდესაც ფერმერები იწყებენ ბაღების გაშენებას ან სხვა პროექტებს და შემდეგ აწყდებიან სირთულეებს. სწორედ მონიტორინგის სისტემები უზრუნველყოფს, რომ ასეთი გამოწვევები დროულად გამოვლინდეს და გადაიჭრას“, - განაცხადა დავით სონღულაშვილმა.
მინისტრმა ასევე ისაუბრა აგროსექტორში პრიორიტეტულ მიმართულებებზე და აღნიშნა, რომ განსაკუთრებული ყურადღება ექცევა იმ სფეროებს, რომლებიც დამატებით გაძლიერებას საჭიროებს. მისი თქმით, ერთ-ერთი მთავარი მიმართულება ცოდნაზე ხელმისაწვდომობა და ექსტენციის სერვისების განვითარებაა, რაც ფერმერებისთვის ექსპერტულ მხარდაჭერასა და კონსულტაციების მიღების შესაძლებლობას გულისხმობს.
„თუ გვინდა, რომ მივიღოთ ხარისხიანი და კონკურენტუნარიანი პროდუქცია, აუცილებელია თანმიმდევრული პოლიტიკის განხორციელება. ეს ნიშნავს, რომ ფერმერებს უნდა ჰქონდეთ წვდომა ცოდნაზე, თანამედროვე ტექნოლოგიებზე და მექანიზაციაზე. ეს არის ის ძირითადი მიმართულებები, რომლებზეც ჩვენ განსაკუთრებულ ყურადღებას ვამახვილებთ“, - აღნიშნა მინისტრმა.
გარდა ამისა, მინისტრის განცხადებით, მნიშვნელოვანია მექანიზაციის განვითარება და თანამედროვე ტექნოლოგიების დანერგვა, რაც პირდაპირ აისახება აგროპროდუქციის ხარისხსა და სექტორის ეფექტიანობაზე. ასევე, განსაკუთრებული ყურადღება ეთმობა სასურსათო უსაფრთხოების პრიორიტეტულ მიმართულებებს, სადაც ფერმერული მეურნეობები ერთ-ერთ მთავარ საყრდენს წარმოადგენს.
მისივე თქმით, პერსპექტიულია ახალი მიმართულებების - აკვაკულტურისა და მარიკულტურის განვითარებაც. ამ ეტაპზე საქართველოში აღნიშნულ სექტორში პროდუქციის დაახლოებით 85% იმპორტირებულია, რაც ადგილობრივი წარმოების განვითარების მნიშვნელოვან პოტენციალზე მიუთითებს.
მინისტრის შეფასებით, აღნიშნული კომპლექსური და მიზანმიმართული რეფორმები შექმნის საფუძველს, რომ საქართველოს სოფლის მეურნეობა გადავიდეს განვითარების ახალ ეტაპზე და ქვეყანამ შეძლოს ხარისხიანი და კონკურენტუნარიანი პროდუქციის წარმოება.
