„თავისუფლება რეჟიმის ტყვეებს“ - ამ სლოგანით ზუგდიდში, სამხარეო რწმუნებულის ადმინისტრაციასთან, საპროტესტო აქცია გაიმართა.
აქციაში მონაწილეობდნენ პატიმრების ოჯახის წევრებიც. მონაწილეები დაკავებულთა გათავისუფლებასა და ახალი არჩევნების დანიშვნას ითხოვენ. გაიმართა მსვლელობაც.
აქციის მონაწილეები მოქალაქეებს მოუწოდებდნენ, მათ პროტესტს შეუერთდნენ. მათ თქმით, მხოლოდ ერთიანობით არის შესაძლებელი "ოცნების" დამარცხება.
როგორც საპროტესტო აქციების ფარგლებში დაკავებული თორნიკე გოშაძის დედამ, მარიზი კობახიძემ „ტვ პირველთან“ განაცხადა, 26 მაისის მოახლოებასთან ერთად ისინი რეგიონებში შეხვედრებს ეტაპობრივად დაიწყებენ.
„რადგან 26 მაისი ახლოვდება, ვიწყებთ რეგიონებში სიარულს. დავიწყეთ ზუგდიდით, ხვალ გავაგრძელებთ. მე როგორც პატიმრის დედა, იმას აღარ ვფიქრობ, რომ მაინცდამაინც ჩემი შვილის გათავისუფლება მოვითხოვო, რადგან ესენი მიხვდნენ, რომ ეს ბიჭები არაფრის აღიარებას აპირებენ და სასჯელს მოიხდიან. ჩვენი მთავარი მოთხოვნა იქნება, რომ ეს მთავრობა აუცილებლად გადადგეს“, - განაცხადა მარიზი კობახიძემ.
