Reuters წერს, რომ ირანთან ომის დიპლომატიური გზით გადაწყვეტის შესახებ იმედები შემცირდა. ცეცხლის შეწყვეტისკენ მიმართული მოლაპარაკებები, რომელიც ორთვიანი კონფლიქტის დასრულებას ისახავდა მიზნად, ჩიხში შევიდა, ხოლო თეირანი და ვაშინგტონი პირობების შემსუბუქების მიმართ მცირე მზადყოფნას ავლენენ.
ირანის საგარეო საქმეთა მინისტრი აბას არაღჩი შუამავლის როლში მყოფ პაკისტანს გასულ შაბათ-კვირას უშედეგოდ დაემშვიდობა, ხოლო აშშ-ის პრეზიდენტმა დონალდ ტრამპი გააუქმა თავისი წარმომადგენლების სტივ უიტკოფისა და ჯარედ კუშნერის დაგეგმილი ვიზიტი ისლამაბადში, რაც მოლაპარაკებების პერსპექტივებს დამატებითი დარტყმა მიაყენა, - წერს Reuters.
გამოცემა აღნიშნავს, რომ ჩიხში შესული ვითარება ტოვებს მსოფლიოს უდიდეს ეკონომიკას და ერთ-ერთ მთავარ ნავთობის ექსპორტიორ ქვეყანას დაპირისპირებაში, რომელმაც უკვე გაზარდა ენერგორესურსების ფასები მრავალწლიან მაქსიმუმებამდე, გაამწვავა ინფლაცია და გააუარესა გლობალური ეკონომიკური ზრდის პერსპექტივები.
ირანის პრეზიდენტმა მასუდ ფეზეშქიანმა პაკისტანის პრემიერ-მინისტრ შეჰბაზ შარიფთნ სატელეფონო საუბარში განაცხადა, რომ თეირანი არ დათანხმდება „ძალის მეშვეობით მოლაპარაკებებს“ მუქარის ან ბლოკადის პირობებში.
ფეზეშქიანმა აღნიშნა, რომ აშშ-მა პირველ რიგში უნდა მოხსნას ირანის პორტების ბლოკადა, ვიდრე მოლაპარაკებების რაიმე საფუძველი შეიქმნება კონფლიქტის მოგვარებისთვის.
თავის მხრივ, აბას არაღჩიმ პაკისტანში ვიზიტი „ძალიან პროდუქტიულად“ შეაფასა. ისლამაბადში მყოფმა ირანელმა დიპლომატიურმა წყარომ განაცხადა, რომ თეირანი არ მიიღებს აშშ-ის მხრიდან „მაქსიმალისტურ მოთხოვნებს“.
დონალდ ტრამპმა ფლორიდაში ჟურნალისტებთან საუბრისას განაცხადა, რომ მან წარმომადგენლების ვიზიტი გააუქმა, რადგან მოლაპარაკებები ითხოვდა ზედმეტ მგზავრობასა და ხარჯებს ირანული მხარის „არაადეკვატური წინადადების“ გამო. ტრამპმა განაცხადა, რომ ირანისგან ახალი წინადადება მიიღეს.
"ირანში უზარმაზარი შიდა დაპირისპირებაა; ისინი ალბათ ლიდერობისთვის იბრძვიან. მე ვინც იქნება, იმასთან ვიმუშავებ. თუ ირანს სურს, შეუძლია დამირეკოს; ყველა კარტი ჩვენ გვაქვს. ყველაფერი მოვიგეთ. ირანმა მოგვცა დოკუმენტი, რომელიც უკეთესი უნდა ყოფილიყო. როგორც კი გავაუქმე მოლაპარაკებები, 10 წუთში მივიღეთ ახალი დოკუმენტი, რომელიც გაცილებით უკეთესია. ჩვენ არ ვაპირებთ 15-16 საათის განმავლობაში მოგზაურობას იმ ადამიანებთან შესახვედრად, რომელთა შესახებაც არავის არაფერი სმენია", - განუცხადა ტრამპმა გუშინ ჟურნალისტებს.
