უნგრეთის საგარეო საქმეთა მინისტრმა პეტერ სიიარტომ განაცხადა, რომ „არასდროს ემსახურებოდა რუსეთის ინტერესებს“.
ამის შესახებ მან Telex-თან ინტერვიუში განაცხადა.
სიიარტოს თქმით, მის საქმიანობასთან დაკავშირებით სახელმწიფო ღალატის ბრალდებები მისთვის მტკივნეულია.
„11 წლის განმავლობაში ვმუშაობდი რუსეთთან ნორმალური, პრაგმატული ურთიერთობების ჩამოსაყალიბებლად“, - განაცხადა სიიარტომ.
მისი განცხადებით, უნგრეთმა სარგებელი მიიღო რუსეთიდან შედარებით იაფი ენერგორესურსების მიწოდებით.
მისივე თქმით, შეურაცხყოფად მიაჩნია, როდესაც მას პრორუს პოლიტიკოსად მოიხსენიებენ, რადგან, მისი თქმით, „არასდროს ემსახურებოდა რუსეთის ინტერესებს“.
„ვინმეს სახელმწიფო ღალატში დადანაშაულება ძალიან სერიოზული საკითხია,“ - განაცხადა პეტერ სიიარტომ.
უნდა აღინიშნოს, რომ სიიარტო მიიჩნეოდა უნგრეთის პრემიერ-მინისტრის ვიქტორ ორბანი პრორუსული პოლიტიკის ერთ-ერთ მთავარ სახედ.
მანამდე გავრცელებულმა სატელეფონო ჩანაწერებმა, სადაც სიიარტო სავარაუდოდ ევროკავშირის საგარეო საქმეთა მინისტრების შეხვედრების დეტალებს რუსეთის საგარეო საქმეთა მინისტრ სერგეი ლავროვის აწვდიდა, ორბანის საარჩევნო კამპანიის პერიოდში პოლიტიკური სკანდალი გამოიწვია. გავრცელებული ჩანაწერების მიხედვით, 2022 წლის შემდეგ სიიარტო არაერთხელ იმყოფებოდა მოსკოვში და სანქციების შემსუბუქებაში დახმარებას სთავაზობდა.
შეგახსენებთ, რომ ცოტა ხნის წინ უნგრეთის მომავალმა პრემიერ-მინისტრმა პეტერ მადიარმა განაცხადა, რომ სიიარტო სანქციებთან დაკავშირებული მნიშვნელოვანი დოკუმენტების განადგურებით იყო დაკავებული.
ასევე, უნგრეთის საგარეო საქმეთა მინისტრის მომავალმა კანდიდატმა ანიტა ორბანმა სიიარტო გააფრთხილა, რომ დოკუმენტების განადგურება კანონდარღვევაა.
