ვუსმინე რა პაველ ჰერჩინსკის განცხადებას, გამიჩნდა ეჭვი, რომ შემდეგი ფაზა წყევლაზე გადასვლაა. ევროკავშირისგან აქამდე იყო დასანქცირებით შანტაჟი, ახლა გვემუქრება, თურმე ომში, გაჭირვებასა და სიღარიბეში დავბრუნდებით, – ამის შესახებ პარლამენტის ვიცე-სპიკერმა, ნინო წილოსანმა განაცხადა.
„შემდგომი ფაზა აშკარად წყევლა იქნება. ფაქტია, ჰერჩინსკი აჟღერებს იმ ევრობიუროკრატების პოზიციებს და მუქარებს, რომლებიც მთელი წლების განმავლობაში საკმაოდ მკაცრად გვიპირისპირდებოდნენ, ამ ქვეყანაში სუვერენიტეტის დაცვას უპირისპირდებოდნენ. უპირისპირდებოდნენ იმას, რომ ქართველ ხალხს ჰქონოდა არჩევანის საშუალება, რომ ოჯახი და სხვა ულტრალიბერალური მიმდინარეობები მისთვის უფრო ღირებული ყოფილიყო, უპირისპირდებოდნენ იმას, რომ ამ ქვეყანას სცოდნოდა გამჭვირვალედ, ვინ რას გეგმავს და რას აპირებს. ალბათ, ევროკავშირის ელჩს ბრიტანეთის ელჩმა და წარმომადგენლებმა უნდა დაუსვან კითხვა – მისთვის ბრიტანეთი, როგორც არაევროკავშირის წევრი, თუ ომის, არეულობის, სამოქალაქო დაპირისპირების და სიღარიბის რისკის ქვეშ დგას, ალბათ შეუძლია, იგივე ბრიტანეთის ელჩსაც უთხრას, რადგან ნამდვილად ვერ მივხვდით და ვერ დავიჭირეთ ლოგიკა. საქართველო აგრძელებს ევროკავშირისკენ სვლას, თუმცა ისეთი ბიუროკრატები, როგორიც ამ განცხადების ავტორია, ევროპას ევროპის გზისკენ ნამდვილად ვერ წაიყვანენ.
ელჩი ორ ქვეყანას შორის მეგობრობის და თანამშრომლობის საფუძველია. ამ შემთხვევაში ვხედავთ, რომ პაველ ჰერჩინსკი თავის მისიას ყველაზე უხერხულად ასრულებს და ყველაზე არამეგობრული განცხადებებით გამოდის. გვინახავს დიპლომატები, რომლებსაც, რაღაც კონკრეტული დავალებების მიუხედავად, თავიანთი პირადი ინიციატივით გამოუხატავთ კეთილგანწყობა და პირიქით არ გაუღვივებიათ დაპირისპირება. ელჩი, როგორც დიპლომატი, უნდა ცდილობდეს ქვეყნებს შორის გაუგებრობების, დაპირისპირების, თუ სხვადასხვა დისონანსის აღმოფხვრას, გასწორებას და არა ამ ყველაფრის გაუარესებას“, – განაცხადა ნინო წილოსანმა.
შეგახსენებთ, ევროკავშირის ელჩმა საქართველოში პაველ ჰერჩინსკიმ ბრიუსელში, ევროპის საგარეო ქმედებათა სამსახურში, სადაც დოკუმენტური ფოტოგამოფენა „საქართველო ფოკუსში“ გაიხსნა, აღნიშნა, რომ საქართველო სწორ ტრაექტორიაზე აღარ იმყოფება.
ელჩის თქმით, „ხელისუფლებამ აირჩია ალტერნატიული, ავტორიტარიზმის მოდელი და საქართველოს ევროკავშირს აშორებს“.
„საქართველო გზაგასაყარზე დგას. საქართველოს მომავალი ჯერ არ დაწერილა, მაგრამ ის, რაც მომავალ კვირებსა და თვეებში გადაწყდება, განსაზღვრავს, ეკუთვნის საქართველო ევროპული ქვეყნების ოჯახს, რომელიც დაფუძნებულია დემოკრატიაზე, კანონის უზენაესობასა და ადამიანის უფლებებზე, თუ სამწუხაროდ, თავის ბნელ წარსულს დაუბრუნდება. ჩემი მთავარი გზავნილი ქართველი ხალხის მიმართ არის „ნუ დაკარგავთ იმედის“. ჩვენ არ უნდა დავუშვათ, რომ საქართველო და შესანიშნავი, თბილი, სტუმართმოყვარე ქართველი ხალხი დაბრუნდეს ძალადობის, სამოქალაქო ომის, სიღარიბის, გაჭირვების, კორუფციის ბნელ დროში. ეს არ არის ის მომავალი, რომელსაც ისინი იმსახურებენ.
როგორც კი ხელისუფლება გამოთქვამს ჩვენთან თანამშრომლობის სურვილს, ჩვენ ყველაფერს გავაკეთებთ იმისათვის, რომ დავეხმაროთ საქართველოს გახდეს ევროკავშირის წევრი“, - განაცხადა ჰერჩინსკიმ.
