დიდი ბრიტანეთის პრემიერ-მინისტრმა კირ სტარმერმა ჩაგოსის კუნძულების მავრიკისთვის გადაცემის გეგმები გადადო. არქიპელაგის კუნძულ დიეგო-გარსიაზე აშშ-ბრიტანეთის ავიაბაზა მდებარეობს. ამის შესახებ BBC იუწყება.
აღნიშნული შეთანხმება წარსულში აშშ-ს პრეზიდენტმა დონალდ ტრამპმა არაერთხელ გააკრიტიკა.
ბრიტანეთის ოფიციალურმა პირებმა განაცხადეს, რომ ისინი სრულად არ ამბობენ უარს გეგმებზე, თუმცა ვადა ამოიწურა იმ კანონმდებლობის მისაღებად, რომელიც სესიის დასრულებამდე უნდა დამტკიცებულიყო უახლოეს კვირებში.
ბრიტანეთის მთავრობის წარმომადგენელმა განაცხადა, რომ დიეგო-გარსია არის როგორც დიდი ბრიტანეთისთვის, ისე აშშ-სთვის „კრიტიკულად მნიშვნელოვანი სტრატეგიული სამხედრო აქტივი“.
„გრძელვადიანი ოპერაციული უსაფრთხოების უზრუნველყოფა არის და დარჩება ჩვენს პრიორიტეტად — ეს არის ამ შეთანხმების მთავარი მიზეზი. ჩვენ კვლავ გვჯერა, რომ შეთანხმება არის საუკეთესო გზა ბაზის გრძელვადიანი მომავლის დასაცავად, თუმცა ყოველთვის ვამბობდით, რომ მას მხოლოდ აშშ-ის მხარდაჭერის შემთხვევაში გავაგრძელებდით. ჩვენ ვაგრძელებთ თანამშრომლობას აშშ-სა და მავრიკთან,“ - განაცხადა ბრიტანეთის მთავრობის წარმომადგენელმა.
ჩაგოსის კუნძულები, ოფიციალურად ცნობილი როგორც ბრიტანეთის ინდოეთის ოკეანის ტერიტორია, გაერთიანებული სამეფოს კონტროლქვეშ მე-19 საუკუნის დასაწყისიდან იმყოფება.
