უკრაინის საგარეო საქმეთა მინისტრმა ანდრიი სიბიჰამ განაცხადა, რომ უკრაინა იმედოვნებს, რომ მომავალ თვეში იურიდიულად გააფორმებს შეთანხმებას რუსული აგრესიის დანაშაულისთვის სპეციალური ტრიბუნალის შექმნის შესახებ.
უკრაინის საგარეო საქმეთა მინისტრმა განაცხადა, რომ 31 მარტს კიევში ევროკავშირის საგარეო საქმეთა მინისტრების შეხვედრის შემდეგ, ევროკავშირის 13-მა წევრმა სახელმწიფომ და კიდევ ერთმა არაწევრმა ქვეყანამ განაცახდეს, რომ სპეციალური ტრიბუნალის შესახებ შეთანხმებას შეუერთდებიან.
სიბიჰას თქმით, შეთანხმებაში მონაწილეობის წინასწარი დადასტურება სულ 16-მა ქვეყანამ წარადგინა, რაც სავალდებულო საკანონმდებლო მინიმუმია.
მინისტრის თქმით, უკრაინა იმედოვნებს, რომ სპეციალური ტრიბუნალის სამართლებრივი ჩარჩო მომავალ თვეში, კიშინიოვში ევროპის საბჭოს მინისტრთა კომიტეტის შეხვედრაზე საბოლოოდ დამტკიცდება.
„პროცედურის მიხედვით, ჩვენ 16 ქვეყანა გვჭირდება. ამ რაოდენობის ქვეყნებისგან უკვე გვაქვს წინასწარი დადასტურება, მაგრამ ისინი საჭირო პროცედურებს გადიან. ეს მნიშვნელოვანია, რადგან სპეციალური ტრიბუნალის შექმნის შემდეგი მნიშვნელოვანი ეტაპია მაისში ევროპის საბჭოს საგარეო საქმეთა მინისტრების შეხვედრა კიშინიოვში. ამიტომ, მნიშვნელოვანია, რომ ჩვენ შევკრიბეთ ზუსტად საჭირო რაოდენობის სახელმწიფოები ტრიბუნალის იურიდიულად და ფორმალურად შესაქმნელად“, - განაცხადა სიბიჰამ.
