ორგანიზაცია Animal Project-ის წარმომადგენლები, მიუსაფარი ცხოველების ჰიპერ-პოპულაციის პროგრამის განხორციელების დროს ჩადენილი შესაძლო დანაშაულების შესახებ, საგანგებო განცხადებას ავრცელებენ.

 მათი განცხადებით, სურსათის ეროვნული სააგენტო, საჯაროდ ავრცელებს ცრუ ინფორმაციას და ამბობს, რომ მიუსაფარი ძაღლები გადაყვანილნი არიან "მანიპულაციებისთვის" ქუთაისში და რომ ისინი დაბრუნდებიან უკან, თუმცა ცხოველების უმეტესობა უკან აღარ დაბრუნდება.

"გუშინ გავავრცელეთ ერთობლივი განცხადება, რომელსაც 30,000-ზე მეტი ცხოველმოყვარული აქტივისტი/მოქალაქე და 40-ზე მეტი ორგანიზაცია თუ კომპანია შემოუერთდა. პირველ რიგში ვითხოვთ სტერილიზაციის კამპანიის სრულფასოვნად ჩატარებას და სტერილიზაციისთვის წაყვანილი ცხოველების პირვანდელ ტერიტორიაზე დაბრუნებას. 

2025 წელს საქართველოში დაიწყო მიუსაფარი ძაღლების სტერილიზაცია/კასტრაციის საპილოტე პროგრამა, რომლის ფარგლებშიც სტერილიზაციისთვის გადაყვანილი ცხოველების უმრავლესობა უკან აღარ დაბრუნებულა. ასევე, ხშირად მიჰყავდათ უკვე სტერილიზებული (საჭდიანი) ცხოველებიც. ამას ფაქტებს ადასტურებენ მოქალაქეები და მიმკედლებლები სხვადასხვა რეგიონში, მთელი საქართველოს მასშტაბით. გვაქვს შემთხვევები წავკისშიც და თბილისში, მაგალითად ფონიჭალაშიც, მიუხედავად იმისა, რომ თბილისს საპილოტე პროგრამა არ ეხება. ბოლო პერიოდში ვირუსულად გავრცლედა კადრები ზუგდიდიანაც, სადაც ადგილობრივი მოქალაქე სალომე ფარცვანია აცხადებს, რომ სავარაუდოდ მისი მიკედლებული ძაღლი წაიყვანეს და მის მიერ გავრცელებულ ფოტო-ვიდეო მასალაშიც ნათლად ჩანს, რომ თავშესაფარში სტერილიზაციისთვის გადაყვანილ ცხოველებს უკეთიათ საჭდეები, რაც ადასტურებს იმას, რომ ეს ცხოველები არიან გასტერილებულები და მაინც წაიყვანეს.  

სურსათის ეროვნული სააგენტო, საჯაროდ ავრცელებს ცრუ ინფორმაციას და ამბობს, რომ აღნიშნული ძაღლები გადაყვანილნი არიან “მანიპულაციებისთვის” ქუთაისში და რომ ისინი დაბრუნდებიან უკან. 

სინამდვილეში კი, როგორც სალომე ფარცვანიასთან პირად საუბარში, ასევე რამდენიმე სხვა დაინტერესებულ პირთან, ვეტერინარებთან და ორგანიზაციის წარმომადგენლებთან პირად საუბარშიც აღნიშნეს, ცხოველების უმეტესობა უკან აღარ დაბრუნდება.

თუ სად მიჰყავთ ეს ცხოველები,  ამაზე მათი პასუხი გახლავთ: “ბუნებაში გავუშვებთ.” 

ნებისმიერ შემთხვევაში, გასტერილებული ცხოველების სხვა ტერიტორიაზე გადასახლება და მითუმეტეს მათი დაუსახლებელ ტერიტორიებზე დატოვება არის ცხოველისადმი სასტიკი მოპყრობა, არაჰუმანური აქტი და სრულიად ეწინააღმდეგება “შინაურ ბინადარ ცხოველთა შესახებ” საქართველოს კანონის მე-4 მუხლს, რომელიც 2025 წლის ივლისში თავადვე მიიღო “ქართულმა ოცნების” მთავრობამ. 

გუშინ, პირველ აპრილს ზუგდიდელი ძაღლების ნაწილი მართლაც დააბრუნეს. ზუგდიდელი აქტივისტები დილის 7 საათიდან პატრულირებდნენ ქუთაისის თავშესაფართან, რომ ენახათ, სად წაიყვანდნენ ძაღლები. დაახლოებით 28 ძაღლი ჩამოსვეს სრულიად უკაცრიელ ტერიტორიაზე, სადაც მხოლოდ ერთი ქარხანაა და არის ავტომაგისტრალი, რომელიც ხშირად იმსხვერპლებს ხოლმე ცხოველებს და ადგილობრივი ცხოველმოყვარულები ,,სიკვდილის გზას” ეძახიან.

ცხოველების ტრანსპორტირება ხდება არაჰუმანურ პირობებში. ძაღლები, რომლებიც ერთმანეთს არ იცნობდნენ, საერთო, ვიწრო გალიებში იყვნენ განთავსებული, ნაჩხუბრები და დასტრესილები.

საგულისხმოა ისიც, რომ რამდენიმე კვირით ადრე აქტივისტებთან შეხვედრისას სურსათის ეროვნულმა სააგენტომ განაცხადა, რომ საჭდიანი (ანუ უკვე სტერილიზებული) ძაღლების წაყვანა საჭირო იყო როგორც რევაქცინაციისთვის და აღრიცხვისთვის (რაც ადგილზევეა შესაძლებელი), ისე ახალი საჭდეების დასამაგრებლად (რადგან სხვა ორგანიზაციების საჭდეებს საკუთარ ბაზაში ვერ აღრიცხავდნენ ეს ცალკე მათი ტექნიკური პრობლემაა). 

თუმცა დაბრუნებულ ცხოველებს არ ეკეთათ ახალი საჭდეები, რაც ნიშნავს, რომ სააგენტომ ისევ მოგვატყუა. გარდა ამისა, თუ სააგენტო სხვა ორგანიზაციის საჭდის ნომრის აღრიცხვას ვერ ახერხებს, გაუგებარია, როგორ შეძლებენ, თავიდან აირიდონ იმავე ძაღლების ხელახლა გადაყვანა თავშესაფარში.

როცა მოხალისეებმა სურვილი გამოთქვეს, ძაღლები თავად დაებრუნებინათ ქალაქში, ეკიპაჟის წევრებმა მათ მითითება მისცეს, რომ ძაღლები „გარეუბნებში გაეფანტათ“. “შინაურ ბინადარ ცხოველთა შესახებ” საქართველოს კანონი და 412-ე განკარგულება არ ავლებს ზღვარს ქალაქსა და ცენტრს შორის. გაუგებარია, რის საფუძველზე დანერგა სააგენტომ ასეთი პრაქტიკა. 

გუშინწინ გავრცელდა კადრები გორის თავშესაფრიდანაც, სადაც ჩანს, რომ თავშესაფარში კრემატორიუმია ჩართული და შენობიდან კვამლი დილის ღამის 12 საათიდან დილის  7 საათამდე ამოდიოდა," - განაცხადა Animal Project-ის თანადამფუძნებელმა, ნათია ჩიქოვანმა.