საფრანგეთის პრეზიდენტმა ემანუელ მაკრონმა აშშ-ის პრეზიდენტ დონალდ ტრამპის განცხადებებს უპასუხა პარიზის მიერ ახლო აღმოსავლეთში აშშ-ის ქმედებების არასაკმარისი მხარდაჭერის შესახებ. ამის შესახებ BFMTV იუწყება.
გუშინ ტრამპმა უკმაყოფილება გამოთქვა იმის გამო, რომ საფრანგეთმა ისრაელისთვის განკუთვნილი სამხედრო თვითმფრინავებს თავის ტერიტორიაზე ფრენის უფლება არ მისცა.
მაკრონმა განაცხადა, რომ აშშ-ს ირანის წინააღმდეგ ოპერაციების დაწყებამდე საფრანგეთთან კონსულტაციები არ გაუმართავს და რომ ქვეყანა ახლო აღმოსავლეთში სამხედრო მოქმედებებში არ არის ჩართული.
„სრულიად სამართლიანია, რომ საფრანგეთი, რომელთანაც კონსულტაცია არ გამართულა და რომელიც არ არის შეერთებული შტატებისა და ისრაელის მიერ დაწყებული ამ სამხედრო ოპერაციის მონაწილეთა შორის, არ მონაწილეობს [სამხედრო მოქმედებებში]. მაგრამ ეს სიახლე არ არის, ასეა პირველივე დღიდან, ამიტომ გასაკვირი არ არის“, - განაცხადა საფრანგეთის პრეზიდენტმა ტოკიოში ვიზიტის დროს.
მაკრონმა მოუწოდა ახლო აღმოსავლეთში კონფლიქტის მხარეებს, მიაღწიონ მშვიდობას, დეესკალაციას და მოლაპარაკებების განახლებას, როგორც საბრძოლო მოქმედებების დასრულების ერთადერთ საშუალებას.
„არაფერია იმაზე უარესი, ვიდრე კვირების განმავლობაში რეგიონის დაბომბვა და შემდეგ მისი ახალი ჩარჩოს დაწესების გარეშე დატოვება. ზუსტად ეს არის ის, რასაც საფრანგეთი უჭერს მხარს - ძლიერი თანამშრომლობის ჩარჩოს“, - განმარტა მან.
მაკრონმა ასევე ხაზგასმით აღნიშნა, რომ საფრანგეთსა და იაპონიას, აზიის, ახლო აღმოსავლეთისა და ევროპის რამდენიმე სხვა ქვეყანასთან ერთად, შეუძლიათ დიდი როლი შეასრულონ ჰორმუზის სრუტის გავლით სათანადო ტრანზიტის უზრუნველყოფაში. მან განმარტა, რომ საქმე სამხედრო ვარიანტებს არ ეხება.
