შინაგან საქმეთა სამინისტროს ცნობით, საქართველოს კათოლიკოს-პატრიარქის, ილია II-ის გარდაცვალებასთან დაკავშირებით, სამების საკათედრო ტაძრის მიმდებარე ტერიტორიაზე ავტომობილების მოძრაობა შეზღუდულია. რაც შეეხება ქვეითად მოსიარულეებს, უწყების განცხადებით, მათ მეტროსადგურ „ავლაბრიდან" სამების საკათედრო ტაძრამდე ასვლა მესხიშვილის ქუჩის გავლით შეეძლებათ, ხოლო უკან ჩამოსვლა გონაშვილის ქუჩის გავლით იქნება შესაძლებელი.
„ტრანსპორტის მოძრაობა აკრძალულია: ავლაბრის მოედნიდან მესხიშვილისა და გონაშვილის ქუჩებზე, სამების საკათედრო ტაძრის მიმართულებით; ბარათაშვილის აღმართიდან წურწუმიას ქუჩის მიმართულებით; ახვლედიანის ქუჩიდან სამრეკლოს ქუჩის მიმართულებით; საინგილოს ქუჩიდან გუმბრის ქუჩის მიმართულებით; გორკის და ბუხაიძის ქუჩიდან სამრეკლოს ქუჩის მიმართულებით; წურწუმიას ქუჩიდან გურჯაანის ქუჩის მიმართულებით. გადაადგილება ასევე აკრძალულია მესხიშვილისა და გონაშვილის ქუჩების მიმართულებით დმანისის, ვახტანგ მეექვსის, ავლაბრის, ირბახისა და ცისკრის ქუჩებიდან.
რაც შეეხება ქვეითად მოსიარულეებს, მათ მეტროსადგურ „ავლაბრიდან" სამების საკათედრო ტაძრამდე ასვლა მესხიშვილის ქუჩის გავლით შეეძლებათ, ხოლო უკან ჩამოსვლა გონაშვილის ქუჩის გავლით იქნება შესაძლებელი",- ნათქვამია განცხადებაში.
მოძრაობის შეზღუდვასთან დაკავშირებით საპატრიარქომაც გაავრცელა განცხადება, სადაც სასულიერო პირებს მოუწოდებენ, რომ პოლიციის მიერ მითითებული ტერიტორიიდან ფეხით გადაადგილდნენ.
„ყოვლადწმინდა სამების საპატრიარქო ტაძრისკენ ავტომანქანებით მოძრაობა შეზღუდულია. სასულიერო პირებს გთხოვთ, გაითვალისწინოთ აღნიშნული ვითარება და პოლიციის მიერ მითითებული ტერიტორიიდან გადაადგილდეთ ფეხით",- აღნიშნულია საპატრიარქოს განცხადებაში.
