სასამართლომ ეკონომიკისა და მდგრადი განვითარების მინისტრის ყოფილ მოადგილეს, რომეო მიქაუტაძეს ათი წლით პატიმრობა მიუსაჯა. ამასთან, სახელმწიფო სამსახურში თანამდებობის დაკავება აეკრძალა ორი წლის ვადით. გადაწყვეტილება მოსამართლე ნინო გალუსტაშვილმა გამოაცხადა.
სასამართლომ მიქაუტაძე ყველა წარდგენილ ბრალში დამნაშავედ ცნო.
სასამართლოს გადაწყვეტილებით, რომეო მიქაუტაძეს უნდა ჩამოერთვას შემდეგი ქონება: ესპანეთში არსებული 120 კვ ბინა, ავტომობილები, წეროვანში არსებული სახლი, რომლის ფართია 1 200 კვადრატი, „ნახიდურ ჰესის“ 15%-იანი წილი და ჩხრეკის შედეგად ამოღებული ნივთები.
წინა სასამართლო პროცესზე საბოლოო სიტყვის უფლებით ისარგებლა რომეო მიქაუტაძემ, რა დროსაც აღნიშნა, რომ მზად არის „აღიაროს არარსებული დანაშაული, აანაზღაუროს არარსებული ზიანი და გაფორმდეს საპროცესო შეთანხმება“. პროკურატურაში კი განმარტეს, რომ მიქაუტაძე ბრალს არ აღიარებს და ასეთ შემთხვევაში საპროცესო შეთანხმება არ ფორმდება.
სამართალდამცველებმა ეკონომიკის და მდგრადი განვითარების მინისტრის ყოფილი პირველი მოადგილე 2025 წლის 20 ივნისს დააკავეს. რომეო მიქაუტაძეს სისხლის სამართლის კოდექსის რამდენიმე მუხლით ჰქონდა წარდგენილი ბრალდება, მათ შორის, 333-ე მუხლით, რაც სამსახურებრივი უფლებამოსილების გადამეტებას გულისხმობს, რის გამოც ფიზიკური ან იურიდიული პირის უფლების, საზოგადოების ან სახელმწიფოს კანონიერი ინტერესი დაირღვა. დანაშაული ისჯება ჯარიმით ან შინაპატიმრობით ექვსი თვიდან ორ წლამდე ანდა თავისუფლების აღკვეთით სამ წლამდე. ამას გარდა, შესაძლებელია თანამდებობის დაკავების აკრძალვა ან საქმიანობის უფლების ჩამორთმევა სამ წლამდე ვადით. ასევე, მიქაუტაძეს ბრალდება წარდგენილი ჰქონდა სისხლის სამართლის კოდექსის 332-ე მუხლის მეორე ნაწილით, რაც სახელმწიფო-პოლიტიკური თანამდებობის მქონე პირის მიერ სამსახურებრივი უფლებამოსილების გადამეტებას გულისხმობს. აღნიშნული დანაშაული ისჯება ჯარიმით ან სამიდან ხუთ წლამდე პატიმრობით, თანამდებობის დაკავების ან საქმიანობის უფლების ჩამორთმევით სამ წლამდე. მიქაუტაძეს ასევე ბრალდება წარდგენილი ჰქონდა სისხლის სამართლის კოდექსის 337-ე მუხლით, რაც მოხელის ან მასთან გათანაბრებულის მიერ პირადად ან სხვისი მეშვეობით საწარმოს, დაწესებულების ან ორგანიზაციის დაარსებას, აკრძალვის მიუხედავად მის მართვაში მონაწილეობას და უკანონო შეღავათების, უპირატესობის მოპოვებას გულისხმობს მფარველობის გზით. დანაშაული სასჯელის სახედ ექვსი თვიდან ორ წლამდე შინაპატიმრობას ან ორიდან ოთხ წლამდე თავისუფლების აღკვეთას, სამ წლამდე ვადით თანამდებობის დაკავების ან საქმიანობის უფლების ჩამორთმევას ითვალისწინებს. მიქაუტაძეს პროკურატურის მიერ ასევე ბრალი წარდგენილი ჰქონდა სისხლის სამართლის კოდექსის 194 მუხლის მესამე ნაწილის გ ქვეპუნქტით, რაც უკანონო შემოსავლის ლეგალიზაციას გულისხმობს (ფულის გათეთრება), რასაც თან ახლდა განსაკუთრებით დიდი ოდენობით შემოსავლის მიღება. დანაშაული ცხრიდან თორმეტ წლამდე პატიმრობას ითვალისწინებს.
