ევროპარლამენტის პრეზიდენტმა რობერტა მეცოლამ განაცხადა, რომ ევროპული ქვეყნები ნავთობისა და გაზის შეძენით აგრძელებენ რუსეთის ომის დაფინანსებას უკრაინაში. ამის შესახებ მან Sky News-თან ინტერვიუში განაცხადა.
მეცოლამ სიტუაციას „მიუღებელი“ უწოდა და ხაზგასმით აღნიშნა, რომ ევროკავშირი საკმარისს არ აკეთებს რუსეთის „ჩრდილოვანი ფლოტის“ შესაჩერებლად.
„ჩვენ ჯერ კიდევ მეტი უნდა გავაკეთოთ ჩრდილოვან ფლოტთან დაკავშირებით, მეტი გემის კონფისკაციაა საჭირო“, - თქვა მან.
შეკითხვაზე, არსებობს თუ არა რუსეთის ჩრდილოვან ფლოტში მოქმედი გემების კონფისკაციის გეგმა, მეცოლამ აღიარა, რომ საკითხი ჯერ კიდევ არ არის გადაწყვეტილი.
„ამ ჩრდილოვან ფლოტზე ბევრი თანამშრომლობა ვნახეთ. საკითხი ჯერ კიდევ არ არის გადაწყვეტილი. ბევრი გემია, რომელიც აგრძელებს ფუნქციონირებას“, - თქვა მან.
ევროპარლამენტის პრეზიდენტმა აღნიშნა, რომ გამოვლინდა გემები, რომლებიც სწრაფად იცვლიდნენ დროშებს და „გაუგებრად“ რეგისტრირდებოდნენ ერთი იურისდიქციიდან მეორეში. ამიტომ, მან აღიარა, რომ ევროკავშირმა „უფრო სწრაფად უნდა იმოქმედოს“.
„ვფიქრობ, კარგ საქმეს ვაკეთებთ, მაგრამ უკეთესი უნდა გავაკეთოთ“, - თქვა მან.
მან ასევე განაცხადა, რომ მიუხედავად იმისა, რომ ევროკავშირმა რუსეთს სანქციათა 19 პაკეტი დაუწესა, მეტი სანქციაა საჭირო.
„ჩვენთვის მიუღებელია ნებისმიერი შესაძლებლობა, რომ რუსეთმა გააგრძელოს ომი უკრაინისა და მთლიანად ევროპის წინააღმდეგ, ისეთი საშუალებების გამოყენებით, რომლებიც შეიძლება უნებლიედ ან აშკარად მოდიოდეს ევროკავშირიდან“, - დასძინა მან.
