საფრანგეთის პრეზიდენტმა ემანუელ მაკრონმა განაცხადა, რომ დღეს უკრაინაში ჯარების გაგზავნა ვითარების ესკალაცია და სიტუაციაზე კონტროლის დაკარგვა იქნება. ამის შესახებ მან მიუნხენის უსაფრთხოების კონფერენციაზე განაცხადა.
მაკრონმა აღნიშნა, რომ ვერ ხედავს ვერანაირ მტკიცებულებას ან დადასტურებას იმისა, რომ რუსები ცდილობენ კომპრომისის მიღწევას სამშვიდობო მოლაპარაკებების ფარგლებში.
„ისინი კვლავ ბომბავენ, ბომბავენ მშვიდობიან მოსახლეობას, დრო გაჰჰყავთ, და რასაც ისინი საკმაოდ სასტიკად აკეთებენ, არის ის, რომ აგროვებენ ყველა იმ დათმობას, რომელსაც მომლაპარაკებლები მიდიან. მათ უბრალოდ დრო გაჰყავთ. ამიტომ, ჩვენ უნდა ორგანიზება გავუწიოთ, რათა გავუძლოთ და წინააღმდეგობა შევძლოთ“, - თქვა მან.
„დღეს, თუ ჩვენ ჩავერთებით, ესკალაციაზე პასუხისმგებლობას ჩვენ ავიღებთ“, - განაცხადა საფრანგეთის პრეზიდენტმა.
მან ასევე დასძინა, რომ დღეს ჯარების გაგზავნასთან დაკავშირებით კონსენსუსი არ იქნება.
„ვფიქრობ, ჩვენ ვიქნებით პასუხისმგებელი მის პროვოცირებაზე. ვფიქრობ, რომ ჩვენ ალბათ სიტუაციაზე კონტროლს დავკარგავთ. ჩვენთვის ახლა მნიშვნელოვანია იმ პაკეტის განხორციელება, რომელსაც ჩვენ მივეცით ხმა“, - აღნიშნა მაკრონმა.
მან ხაზი გაუსვა შეერთებულ შტატებთან სიტუაციის საერთო გაგების მნიშვნელობას.
„ამიტომ, მე მჯერა, რომ უახლოეს კვირებში ჩვენი მთავარი პრიორიტეტი უნდა იყოს შეერთებულ შტატებთან თანამშრომლობის აღდგენა. რათა მათ, ჩვენთან ერთად, შეაფასონ ის ფაქტი, რომ მოკლევადიანი მოლაპარაკებების ადგილი აღარ არის. და შემოიღონ დამატებითი სანქციები, დამატებითი ზომები ჩრდილოვანი ფლოტის წინააღმდეგ და გაზარდონ ზეწოლა რუსეთის ეკონომიკაზე“, - აღნიშნა მაკრონმა.
