უკრაინის საგარეო საქმეთა მინისტრმა ანდრიი სიბიჰამ დაგმო რუსეთის მიერ კიევზე, დნიპროსა და ოდესის ოლქებზე ღამით განხორციელებული მასობრივი თავდასხმა და პარტნიორებს მოუწოდა მოსკოვზე დიპლომატიისა და დეესკალაციის იძულების მიზნით ზეწოლა გაზარდონ.
„ასობით დრონი და ბალისტიკური რაკეტა ელექტროქსელს უტევდა, რამაც ელექტროენერგიის, გათბობისა და წყლის მიწოდების გათიშვა გამოიწვია. დაშავდნენ მშვიდობიანი მოქალაქეები, მათ შორის ჩვილი და 4 წლის ბავშვი. არავის შეუძლია თვალი დახუჭოს რუსულ ტერორიზმზე. ეს ახლა ევროპის ცენტრში ხდება. ოლიმპიური ზავისა და აშშ-ის ხელმძღვანელობით სამშვიდობო ძალისხმევის მიუხედავად“, - დაწერა სიბიჰამ.
უკრაინის საგარეო საქმეთა მინისტრმა ასევე გააკრიტიკა საერთაშორისო ოლიმპიური კომიტეტის პოზიცია.
„საერთაშორისო ოლიმპიური კომიტეტი ცდილობს სამარცხვინოდ დაბლოკოს სპორტსმენები და დაღუპულთა ხსოვნა, მაგრამ მას არ შეუძლია აკრძალოს რეალობა.
მეორე მსოფლიო ომის შემდეგ ევროპაში ყველაზე მასშტაბური აგრესიული ომის რეალობა.
ყოველი ასეთი დარტყმა დარტყმაა ომის დასრულებისკენ მიმართული სამშვიდობო ძალისხმევისთვის. რუსეთი იძულებული უნდა გახდეს, დიპლომატიას და დეესკალაციას სერიოზულად მოეკიდოს. ამის მიღწევა მხოლოდ ერთიანობით, ძალითა და მოსკოვზე ზეწოლის გაზრდით არის შესაძლებელი“, - აღნიშნა სიბიჰამ.
ცნობისათვის, საერთაშორისო ოლიმპიურმა კომიტეტმა 2026 წლის ზამთრის ოლიმპიადაზე 2 სპორტსმენს უკრაინის მხარდამჭერი ჩაფხუტებით ასპარეზობის უფლება არ მისცა.
მოთხილამურე ეკატერინე კოცარამ უკრაინულ მედიასთან განაცხადა, რომ მას სურდა გამოეყენებინა ჩაფხუტი წარწერით - "იყავით მამაცები, როგორც უკრაინელები" - თუმცა ამის უფლება არ მისცეს. ასევე ასპარეზობის უფლება ამი მისცეს ჩაფხუტით უკრაინელ სკელეტონ მრბოლელს ვლადისლავ გერასკევიჩს, რომელსაც ჰქონდა ჩაფხუტო ომში დაღუპული უკრაინელი სპორტსმენების ფოტოებით.
