ინდოეთმა და ევროკავშირმა თავისუფალი ვაჭრობის შესახებ შეთანხმება გააფორმეს. შეთანხმება, შესაძლოა ერთ წელიწადში ამოქმედდეს.
Reuters-ის ცნობით, შეთანხმება შეამსუბუქებს ტრამპის 50%-იანი ტარიფების გავლენას ნიუ დელიზე. ეს გააფართოვებს ევროპელი ავტომწარმოებლების წვდომას ინდოეთის ავტომობილების ბაზარზე გადასახადების 110%-დან 40%-მდე შემცირებით.
„გუშინ ევროკავშირსა და ინდოეთს შორის მნიშვნელოვანი შეთანხმება გაფორმდა,“ - განაცხადა ინდოეთის პრემიერ-მინისტრმა ნარენდრა მოდიმ.
მოდის თქმით, „ეს შეთანხმება დიდ შესაძლებლობებს გაუხსნის ინდოეთში 1.4 მილიარდ, ევროპაში კი მილიონობით ადამიანს“.
„ის გლობალური მშპ-ს 25%-ს და მსოფლიო ვაჭრობის მესამედს მოიცავს“, - აღნიშნა მან.
გამოცემის წყაროს ცნობით, შეთანხმების ოფიციალური ხელმოწერა მისი სამართლებრივი განხილვის შემდეგ მოხდება, რასაც, სავარაუდოდ, ხუთიდან ექვს თვემდე დასჭირდება. მისივე თქმით, შეთანხმების ამოქმედება ერთ წელიწადშია მოსალოდნელი.
